პროკურატურის ინფორმაციით, სამეგრელოში 8 წლის ბავშვის გაუპატიურების ბრალდებით დაკავებულმა პირებმა არასრულწლოვანზე 2020 წლიდან სექსუალურად რამდენჯერმე იძალადეს.

მათივე განცხადებით, ერთ-ერთმა ბრალდებულმა 2018 წელს დაზარალებულის ასაკის გამო უმწეობის გამოყენებით, ძალადობით 9 წლის გოგოს მიმართ სექსუალური ხასიათის სხვაგვარი ქმედება ჩაიდინა.

როგორც უწყებაში ამბობენ, ბრალდებული პირები არასრულწლოვნებს სიცოცხლის მოსპობით ემუქრებოდნენ, თუ ისინი მომხდარის შესახებ ვინმეს მოუყვებოდნენ.

პროკურატურის ცნობით, პოლიციამ აღნიშნული ორი პირი 23 ივნისს დააკავა. აღნიშნულ პირებს ბრალდება სისხლის სამართლის კოდექსის 137-ე მუხლის მე-4 ნაწილის "გ" ქვეპუნქტით წარედგინათ, რაც გულისხმობს გაუპატიურებას ჩადენილი წინასწარი შეცნობით(ბ.გ.-ს ორი ეპიზოდი, ზ.გ.-ს სამი ეპიზოდი), ხოლო ზ.გ.-ს, ასევე, ბრალდება 138-ე მუხლის მე-3 ნაწილის "გ" ქვეპუნქტით წარედგინა, რაც გულისხმობს სექსუალური ხასიათის სხვაგვარ ქმედებას, ჩადენილი ძალადობით, დაზარალებულის უმწეობის გამოყენებით, წინასწარი შეცნობით თოთხმეტი წლის ასაკს მიუღწეველთან.

ორივე პირისთვის წარდგენილი ბრალდება სასჯელის სახედ და ზომად 15-დან 20 წლამდე ან უვადო თავისუფლების აღკვეთას ითვალისწინებს.უწყება ამბობს, რომ პროკურატურამ ბრალდებულებისთვის აღკვეთის ღონისძიების სახით პატიმრობის გამოყენების შუამდგომლობით სასამართლოს უკვე მიმართა.

8 წლის ბავშვის გაუპატიურების ბრალდებით სამეგრელოში 2 კაცის დაკავების შესახებ დღეს, 25 ივნისს გახდა ცნობილი. არსებული ინფორმაციით, ბრალდებულები მამა და შვილი არიან.

როგორც On.ge-ს შინაგან საქმეთა სამინისტროში განუცხადეს, საქმეზე გამოძიება სისხლის სამართლის კოდექსის 137-ე მუხლით დაიწყო, რაც გაუპატირებას გულისხმობს.