საქართველო ღვინის სამშობლოდ არის აღიარებული. ღვინის დამზადება და თიხის ჭურჭელში შენახვა საქართველოში ჯერ კიდევ 8000 წლის წინ დაიწყო. დღემდე შემორჩენილი ტრადიცია იუნესკოს არამატერიალური ძეგლების სიაშიც კი არის შეტანილი. მრავალსაუკუნოვანი ისტორიის ღირსეულად გაგრძელება და მისი ცნობადობის კიდევ უფრო გაზრდა ქვეყნისთვის უმნიშვნელოვანესია.

სწორედ ამ მიზანს ემსახურება თბილღვინოს ახალი წამოწყებაც — ამბერ რქაწითელისა და ქისის წარმოება.

ქარვისფერი, მზის ჩასვლის ელფერის მქონე ღვინო მხოლოდ ტექნოლოგიითა და არომატით კი არ გამოირჩევა, არამედ თავგადასავლებისა და სიახლის მაძიებელი ადამიანების ცხოვრების სტილის შესაფერისიცაა.

ქარვისფერი ღვინის ფესვები

ქარვისფერი ღვინის მომზადებისას, ევროპული თეთრი ღვინისგან განსხვავებით, ყურძნის კანი კონტაქტში რჩება წვენთან დღეების ან ზოგ შემთხვევაში, თვეების განმავლობაში, სწორედ ამიტომ, ქარვისფერი ღვინო კანთან კონტაქტის მეთოდით დადუღებული თეთრი ღვინის სახელითაცაა ცნობილი.

"მეღვინეობის ეს მეთოდი არის თეთრი ღვინოების დამზადების უძველესი ფორმა, რომელიც საუკუნეებით თარიღდება. საქართველოს არასდროს შეუწყვიტავს ამ გზით თეთრი ღვინის წარმოება", — აღნიშნავს ერიკ აზიმოვი, The New York Times-ის ღვინის კრიტიკოსი

ამბერ ღვინო თბილღვინოსგან

თბილღვინოს ამბერ ქისი და ამბერ რქაწითელი 2021 წლიდან მასობრივად ჩაეშვა ბაზრებზე და ამ ღვინოების დახვეწილმა, ელეგანტურმა და ექსკლუზიურმა გემომ ღვინის მოყვარულთა გულების დაპყრობა უკვე მოახერხა.

ასევე, თბილღვინოს ახალმა ღვინოებმა საერთაშორისო კონკურსებზე დიდი წარმატება მოიპოვა: ამბერ ქისი IWC-სა და IWSC-ს ბრინჯაოს მედლით დაჯილდოვდა, ხოლო ამბერ რქაწითელი IWC-ს ბრინჯაოთი და IWSC-ს ვერცხლით.

"ამ ღვინოს დახვეწილობა, თეთრი ატმის ნაზი არომატი, დაბალანსებული გემო და სიმსუბუქე გამოარჩევს", — ამგვარად აფასებს ქისს საერთაშორისო ჟიური.

"ღვინის მოყვარული ადამიანების გულსა და გონებაში ქარვისფერმა ღვინომ მნიშვნელოვანი ადგილი დაიმკვიდრა. მას აწარმოებენ, ყიდიან და მიირთმევენ მსოფლიოს ყველა კონტინენტზე", — წერს საიმონ ვულფი, ღვინის წამყვანი მედიაპლატფორმა დეკანტერის კრიტიკოსი.

ნიუ-იორკის ღვინოებისა და ალკოჰოლური სასმელების ერთ-ერთი მსხვილი მოვაჭრის Astor Wines-ის შესყიდვების მენეჯერი, ლორენა ასენსიოსი კი აღნიშნავს, რომ "მომხმარებლები ყოველდღიურად გამოხატავენ დიდ ინტერესს ქარვისფერი ღვინისადმი".

ამბერ ქისი და ამბერ რქაწითელი თბილღვინოს ვენახებში მოყვანილი ყურძნისგან მზადდება, დროული და ქრონოლოგიური პროცესები კი სიფრთხილითა და კონტროლით მიმდინარეობს. ღვინოებში კომშისა და გარგარის ჩირის გემოს შეიგრძნობთ. თბილღვინოს ამბერ ღვინო საშუალოსხეულიანია, დაბალანსებული სიმჟავე და ტანინი გამოარჩევს. ის ევროპული კლასიკური მეთოდით დაყენებულ თეთრ ღვინოზე უფრო სხეულიანია და ამიტომაც, ისევე ეხამება სადილს, როგორც ქვევრის ღვინო. ის თანაბრად უხდება როგორც ხორცს: ქათამს, თევზსა და ძეხვეულს, ისე მძაფრი არომატის ყველს, ზეთისხილსა და სოკოს.

1962 წელს, საქართველოში ერთ-ერთი მაღალხარისხოვანი, საექსპორტო ღვინის მწარმოებელი საწარმო გაიხსნა, რომელმაც მალევე მოიპოვა საერთაშორისო აღიარება. 1999 წლიდან კომპანიას სათავეში ძმები ზურაბ და გიორგი მარგველაშვილები ჩაუდგნენ, რითაც სათავე დაედო სრულიად ახალ ეტაპს თბილღვინოს ისტორიაში. საფუძველი ჩაეყარა ღვინის წარმოების ახალ, თანამედროვე ფილოსოფიას, რომლის წინაპირობა არის მომხმარებელი — ინდივიდუალური სურვილებითა და განსხვავებული გემოვნებით.

დღესდღეობით თბილღვინო აკონტროლებს და მართავს წარმოების სრულ ჯაჭვს — ვენახებისთვის მიწის სწორი შერჩევიდან, გასაყიდ ობიექტზე პროდუქციის დისტრიბუციამდე, რაც განაპირობებს საუკეთესო ხარისხს. თბილღვინოს ვენახები 355 ჰექტარზე არის გაშენებული, ქინძმარაულისა და მუკუზანის მიკროზონებში.