"შენნაირი მონადირეები რომ ჰყავს ოპოზიციას, იმიტომ ხართ კარგ დღეში", — ასე მიმართა ქართული ოცნების დეპუტატმა, არჩილ თალაკვაძემ პარლამენტში პლენარულ სხდომაზე ნაციონალური მოძრაობის ერთ-ერთ ლიდერს, ლევან ხაბეიშვილს.

თალაკვაძის თქმით, სწორედ ისინი მოუწოდებდნენ ხალხს შტურმისკენ, რის შედეგადაც ადამიანები დაზიანდნენ.

"წარმოიდგინეთ რა დონის პოპულისტია ლევან ხაბეიშვილი, მოსახლეობაზე როგორმე რომ გავლენა მოახდინოს, დათვი დაუმატა რეზინის და პლასტმასის ტყვიებს, რომელსაც სპეცდანიშნულების რაზმი იყენებს ასეთ შემთხვევებში. აი, შენნაირი მონადირეები რომ ჰყავს ოპოზიციას, იმიტომ ხართ კარგ დღეში. დათვზე, რომ გგონია, რომ მაგ ტყვიებით ნადირობენ. ძალიან სამწუხაროა, რომ სწორედ თქვენი უპასუხისმგებლო ქმედებებით იმიტომ, რომ თქვენ მოუწოდეთ იმ ადამიანებს შტურმისკენ და ძალადობისკენ, დაზიანდნენ მოქალაქეები, დაზიანდნენ ჟურნალისტები, დაზიანდნენ პოლიციელები, მაგრამ თქვენგან განსხვავებით ჩვენ არ მიგვიტოვებია ეს ხალხი უყურადღებოდ", — თქვა თალაკვაძემ.

ხაბეიშვილმა სხდომაზე 20 ივნისის ღამეს გამოყენებული ტყვიების ფოტო მიიტანა და ქართული ოცნების რიტორიკა გააკრიტიკა, რითაც მმართველი გუნდი 20 ივნისის ღამეს განვითარებულ მოვლენებს ხსნის. მანვე განაცხადა, რომ ქართული ოცნება თავიდანვე უშვებდა, რომ ამ სახის ტყვიებს გამოიყენებდნენ, ვინაიდან დღის პირველ ნახევარში განწესში ეს ტყვიები უკვე იყო.