3 წლის ცუგამ, სახელად დიგბიმ რამდენიმე დღის წინ დიდ ბრიტანეთში ქალის სიცოცხლე იხსნა, რომელიც ავტომაგისტრალის ხიდიდან გადმოხტომას აპირებდა. ძაღლის მისვლამდე მაშველები ქალის გადარწმუნებას უშედეგოდ ცდილობდნენ. როდესაც სიტუაცია განსაკუთრებით სახიფათო გახდა, ერთ-ერთ მაშველს ქალის დასახმარებლად თერაპიის ძაღლის, დიგბის მოყვანა მოაფიქრდა. ამ ამბის შესახებ საზოგადოებას სამაშველო სამსახურმა ტვიტერზე უამბო.

ფოტო: Getty Images

დიგბის ძალიან საპასუხისმგებლო სამსახური აქვს. ის მაშველებსა და მეხანძრეებს ტრავმასთან გამკლავებაში ეხმარება. მიუხედავად იმისა, რომ აღნიშნული შემთხვევა ძაღლისთვისაც პირველი გამოცდილება იყო, დიგბიმ მასზე დაკისრებულ როლს თავი მშვენივრად გაართვა: ძაღლის დანახვის შემდეგ, ქალმა ხიდიდან გადახტომა გადაიფიქრა.

"როდესაც დიგბი მოვიდა, ქალი მაშინვე მის სანახავად შემოტრიალდა და გაიღიმა. ამან დიგბისა და სახანძრო სამსახურში მისი როლის შესახებ საუბრის წამოწყების შესაძლებლობა მოგვცა", — ვკითხულობთ სამაშველო სამსახურის ტვიტში.

მაშველებმა ეს შესაძლებლობა ფრთხილად გამოიყენეს და ქალს ხიდიდან ჩამოსვლა და დიგბის გაცნობა შესთავაზეს, რაზეც ქალი, საბედნიეროდ, დათანხმდა. სამაშველო სამსახურმა ქალს ტვიტერზე გამოჯანმრთელება უსურვა. დიგბიმ კი თანამშრომლებთან ერთად საზოგადოების უდიდესი სიყვარული და პატივისცემა დაიმსახურა.