სახალხო დამცველმა, ნინო ლომჯარიამ პარლამენტში ყოველწლიური ანგარიშის წარდგენისას განაცხადა, რომ პოლიტიკური პარტიების დაფინანსების შეწყვეტის კანონპროექტზე ომბუდსმენის დამოკიდებულება კრიტიკულია. ნაციონალური მოძრაობის ერთ-ერთმა ლიდერმა, აკაკი მინაშვილმა მას ჰკითხა, თუ რას ფიქრობდა ის პარტიებისთვის დაფინანსების შეწყვეტის კანონპროექტზე.

"ამ ინსტიტუტს 2008 წელს და მაშინდელ სახალხო დამცველს აქვს ნათქვამი ზუსტად ანალოგიურ სიტუაციაში, რომ ეს იყო ადამიანის უფლებების საწინააღმდეგო პრაქტიკა. მე ვიზიარებ ამ დამოკიდებულებას და სახალხო დამცველი, ზოგადად, წინააღმდეგია ნებისმიერი ინიციატივის, რომელიც შექმნილ ვითარებაში გაურთულებს პარტიებს, ასე ვთქვათ, მდგომარეობას და პოლიტიკურ პლურალიზმს საფრთხის ქვეშ დააყენებს. ამიტომ, ჩემი დამოკიდებულება კრიტიკულია", — განაცხადა ნინო ლომჯარიამ.

პარტიების დაფინანსების შეზღუდვაზე კანონპროექტს პარლამენტმა მეორე მოსმენით 11 ივნისს მხარი დაუჭირა. კანონპროექტის მომხსენებელმა იურიდიულ საკითხთა კომიტეტის თავმჯდომარემ, ანრი ოხანაშვილმა განაცხადა, რომ აღნიშნული ინიციატივის მიზანია, "საბოტაჟის" წინააღმდეგ დაიცვას დემოკრატია.

მისივე თქმით, ეს ითვალისწინებს, როგორც პარტიებისთვის დაფინანსების შეწყვეტის, ასევე, დროებით შეჩერების საკითხს.

ოხანაშვილის განცხადებით, ვენეციის კომისიისა და ეუთო/ოდირის რეკომენდაციების საფუძველზე მიიღეს გადაწყვეტილება, რომ კანონი აამოქმედონ არა გამოქვეყნებისთანავე, არამედ 2022 წლის პირველი თებერვლიდან.

24 მარტს ვენეციის კომისიამ და ეუთო/ოდირმა გამოაქვეყნეს დასკვნა და მოუწოდეს საქართველოს პარლამენტს, რომ გადაეხედათ მოქალაქეთა პოლიტიკური გაერთიანების შესახებ კანონისა და პარლამენტის რეგლამენტში შესატანი ცვლილებებისთვის.

ვენეციის კომისია აღნიშნავდა, რომ საარჩევნო კოდექსში შესატანი ცვლილებები, რომლის თანახმადაც სახელმწიფო დაფინანსების შეწყვეტის შემთხვევაში პარტიებს უფასო საეთერო დრო არ ექნებათ, მათ თანასწორუფლებიანობას დაარღვევდა. ვენეციის კომისია ასევე შეშფოთებული იყო იმ შესწორებით, რომელიც მოქალაქეთა პოლიტიკური გაერთიანების შესახებ კანონში უნდა შევიდეს.

ომბუდსმენმა პარლამენტში 18 ივნისს 2020 წლის ადამიანის უფლებებისა და თავისუფლებების შესახებ წლიური ანგარიში წარადგინა. მოხსენების პრეზენტაციის შემდეგ ნინო ლომჯარიას დეპუტატებმა კითხვები დაუსვეს.

საქართველოში ადამიანის უფლებათა და თავისუფლებათა დაცვის მდგომარეობის შესახებ სახალხო დამცველის 2020 წლის ანგარიშს სრულად შეგიძლიათ გაეცნოთ ამ ბმულზე.