ჯანდაცვის მინისტრის, ეკატერინე ტიკარაძის განცხადებაში, ქვეყანაში ვაქცინაციის პროცესის წყვეტა არ იქნება. ამის შესახებ მან რუსთავი 2-ის ეთერში ისაუბრა.

"ჩვენ გვაქვს დღესდღეობით საკმარისი დოზები იმისათვის, რომ არ მოხდეს ვაქცინაციის პროცესის წყვეტა. ეს არის გარანტი იმის, რომ ეტაპობრივად საქართველოში აიცრება ყველა პირი და აქ ჩვენ რაც არ უნდა გვინდოდეს, რომ გამოვიტანოთ როგორი პრობლემა, რომ ვაქცინის დეფიცია ქვეყანაში, ვაქცინის დეფიციტი არაა", — აღნიშნავს მინისტრი.

მისივე თქმით, ეტაპობრივად ამცრელი ბრიგადების რაოდენობაც გაიზრდება და ქვეყანა დამატებით ვაქცინებსაც მიიღებს. ამასთან, ტიკარაძე ამბობს, რომ ისინი მასობრივი ვაქცინაციის დაწყების პერიოდად მესამე კვარტალს ასახელებდნენ:

"აი, მესამე კვარტალი დადგება და ჩვენ დავიწყებთ მასობრივ ვაქცინაციას".

17 ივნისის მონაცემებით, ჯამურად ჩატარდა 221 156 აცრა. სრულად ვაქცინირებულია 74 495 ადამიანი.