საქართველოს უზენაეს სასამართლოს შენობასთან ტელეკომპანია რუსთავი 2-ის მხარდასაჭერი აქციის მონაწილეებმა შეკრება დაიწყეს. შენობასთან უკვე შეკრებილია რამდენიმე ათეული ადამიანი. სასამართლო დღეს რუსთავი 2-ის საქმეს განიხილავს.

უზენაეს სასამართლოსთან არიან საპატრულო პოლიციის რამდენიმე ათეული თანამშრომელიც. ისინი შენობასთან აქციის მონაწილეების მოსვლამდე მივიდნენ. ტელეკომპანია რუსთავი 2-ის გენერალური დირექტორის თქმით, არხს სასამართლოს მიმდებარე ტერიტორიიდან პირდაპირი ეთერი სასამართლო გადაწყვეტილების მიღებამდე ყოველდღიურად ექნებათ.

ტელეკომპანიის მხარდასაჭერ აქციაზე მისვლას გეგმავენ არხის თანამშრომლები, ცხრა პოლიტიკური პარტიისგან შექმნილი საკოორდინაციო საბჭო და სხვა ოპოზიციური პარტიები, მათ შორის გირჩი.

მოძრაობა თავისუფლებისთვის - ევროპული საქართველოს ლიდერები და მხარდამჭერები თბილისში, პარლამენტის შენობასთან იკრიბებიან. პარტიის წევრი, სერგი კაპანაძე ამბობს, რომ ტელეკომპანიის მეპატრონის და სარედაქციო პოლიტიკის შეცვლა კატასტროფული შედეგების მომტანი იქნება ქვეყნის დემოკრატიის და საგარეო იმიჯისთვის.

უზენაესი სასამართლოს დიდი პალატა, რომელმაც ტელეკომპანიის საქმე უნდა განიხილონ მოსამართლეებისგან: ნინო გვენეტაძე, მზია თოდუა, ვასილ როინიშვილი, ეკატერინე გასიტაშვილი, პაატა ქათამაძე, ბესარიონ ალავიძე, მაია ვაჩაძე, ზურაბ ძლიერიშვილი და გიორგი შავლიაშვილი - დაკომპლექტდა.