ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი, ეკატერინე ტიკარაძე კორონავირუსისგან გამოჯანმრთელდა. როგორც On.ge-ს სამინისტროს პრესსამსახურში განუცხადეს, ის უკვე შეუდგა საქმიანობას და დღეს ქუთაისში გაემგზავრება, სადაც შეხვედრებს გამართავს.

ტიკარაძეს კორონავირუსი 1-ელ ივნისს დაუდასტურდა. მას ვირუსი მსუბუქი ფორმით ჰქონდა და თვითიზოლაციაში იმყოფებოდა. მუშაობას კი, სამინისტროს ინფორმაციით, დისტანციურად აგრძელებდა.

მინისტრმა კორონავირუსის საწინააღმდეგო ვაქცინა AstraZeneca-ს პირველი დოზა 23 მარტს გაიკეთა. ის საჩხერის სამედიცინო ცენტრში პირდაპირ ეთერში აიცრა. აღსანიშნავია, რომ ვაქცინაცია არ ნიშნავს კორონავირუსისგან 100%-იან დაცვას, მაგრამ აცრის შედეგად ინფიცირების შანსი გაცილებით მცირდება, ხოლო ინფიცირების შემთხვევაში, ვირუსი მსუბუქ ფორმებში მიმდინარეობს.