ნინოწმინდის პანსიონის ხელმძღვანელად ბოდბელი მთავარეპისკოპოსი იაკობი დაინიშნა. ინფორმაცია ამის შესახებ On.ge-ს საპატრიარქოს პრესსამსახურის ხელმძღვანელმა, დეკანოზმა ანდრია ჯაღმაიძემ დაუდასტურა.

პანსიონს წლების განმავლობაში მეუფე სპირიდონი ხელმძღვანელობდა. როგორც საპატრიარქოს პრესსამსახურის ხელმძღვანელმა TV პირველთან განაცხადა, "არსებული გარემოებებიდან გამომდინარე" სპირიდონმა თანამდებობის საკუთარი ნებით დატოვა.

რაც შეეხება მეუფე იაკობის დანიშვნას, გადაწყვეტილება პატრიარქმა მიიღო.

"მეუფე სპირიდონი აპირებდა იმას, რაზეც ხელი ჰქონდა მოწერილი, ერთ წელიწადში დაახლოებით რეორგანიზაცია ხდებოდა. მე გავაგრძელებ იმას, რაც იყო. ვფიქრობ, რომ საქმესაც გავაკეთებთ", — განაცხადა მეუფე იაკობმა ჟურნალისტებთან. მისივე მტკიცებით, პანსიონში იმდენი ბავშვი დარჩება, რამდენსაც მოუნდება.

ბოლო ინფორმაციით, პანსიონიდან 30 ბავშვია გაყვანილი და ადგილზე 23 ბავშვი რჩება.