თბილისის მერის, კახა კალაძის განცხადებით გიორგი გახარიას გადაწყვეტილება გადადგომის თაობაზე არ იყო სწორი და ლამაზი.

"გადაწყვეტილება, რაც მან მიიღო, მე არ მოვუწონე. პირადად ჩემთვის არ იყო ეს სწორი გადაწყვეტილება და არ იყო ლამაზი მისი მხრიდან. როდესაც შენ ხარ ქვეყნის პრემიერმინისტრი, პირველი პირი, ერთ-ერთი ლიდერი გუნდში, ასეთ რთულ ვითარებაში, როცა ყველას ერთი მოსაზრება გვქონდა და მოსაზრება იყო ძალიან მარტივი, სახელმწიფო უნდა სახელმწიფობდეს და კანონი უნდა კანონობდეს, არ აქვს მნიშვნელობა შენ რაღაც თანამდებობა გაქვს, თუ რაღაცას წარმოადგენ. თუ დანაშაულს ჩადიხარ, შესაბამისად კანონმა უნდა იმოქმედოს. ის გადაწყვეტილება, რაც მიიღო, მე ვფიქრობ, პირველ რიგში, დამაზიანებელი იყო მისთვის. საქართველოა, საქართველოში ვცხოვრობთ, ასეთი გადაწყვეტილებები მიღებას შესაბამისი შეფასებები მოჰყვება საზოგადოების მხრიდან და ეს მომავალში აისახება მასზეც და მის პოლიტიკურ ცხოვრებაზეც", — განაცხადა კალაძემ იმედის ეთერში.

18 თებერვალს გიორგი გახარია პრემიერმინისტრობის თანამდებობიდან გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას საქმეს დაუკავშირა. მან ახსენა ისიც, რომ გუნდში ამაზე აზრთა სხვადასხვაობა იყო.

22 მარტს გახარია საზოგადოებასთან თანამდებობის დატოვების შემდეგ პირველად გამოჩნდა და თქვა, რომ "არსად წასვლას არ აპირებს, მეტიც, არც პოლიტიკიდან" მიდის. 14 აპრილს კი გახარიას გუნდის ახალმა წევრმა, გიორგი ხოჯევანიშილმა განაცხადა, რომ ისინი მომდევნო არჩევნებისთვის მზადებას დაიწყებენ და შესაბამისად, მონაწილეობასაც მიიღებენ.

ამ ეტაპზე გახარიას გუნდში ქართული ოცნების 6 ყოფილი დეპუტატია. მმართველი პარტიიდან წავიდნენ და ყოფილ პრემიერმინისტრს უერთდებიან: გიორგი ხოჯევანიშვილი, მიხეილ დაუშვილი, ანა ბუჩუკური, ალექსანდრე მოწერელია, ბექა ლილუაშვილი და შალვა კერესელიძე.

გარდა ამისა, გახარიას პოლიტიკურ პარტიას უერთდებიან NATO-ში საქართველოს ყოფილი ელჩი, ლევან დოლიძე და ყოფილი პრეზიდენტის, გიორგი მარგველაშვილის ადმინისტრაციის ხელმძღვანელი, გიორგი აბაშიშვილი.