ლენტეხის მუნიციპალიტეტში, სოფელ ჩიხარეშში ცემის შედეგად გარდაცვლილი კაცის საქმეზე ცრუჩვენების მიცემის ბრალდებით 2 პირი დააკავეს. როგორც ლენტეხის მერი, ბადრი ლიპარტელიანი აცხადებს, ერთ-ერთი დაკავებული სოფელ ჩიხარეშის რწმუნებულის ქმარია.

"ჩიხარეშის გამგებლის მეუღლე დაკავებულია, დამირეკა ჩემმა რწმუნებულმა, ქალბატონმა ანამ, რომ დაკავებულია ჩემი მეუღლე, მხოლოდ ეს ინფორმაცია ვიცი. რისთვის დააკავეს, რატომ დააკავეს, რა კავშირი აქვს ამ სიტუაციასთან ვერ გეტყვით", — ამბობს ლიპარტელიანი.

აღნიშნული პირები სისხლის სამართლის კოდექსის 370-ე მუხლით არიან დაკავებული.

5 ივნისს ლენტეხში კაცს სცემეს, რის შედეგადაც ის საავადმყოფოში გარდაიცვალა. შინაგან საქმეთ სამინისტროს ინფორმაციით, საქმეზე გამოძიება სისხლის სამართლის კოდექსის 117-ე მუხლით მიმდინარეობს, რაც ჯანმრთელობის განზრახ მძიმე დაზიანებას გულისხმობს.