ცნობილი ქართველი ქუჩის მხატვრის, გიორგი გაგოშიძის, იგივე გაგოშას, სტენსილები თბილისში ბევრ ადგილასაა. ამ ნამუშევრების შექმნამ ერთგვარად სოციალური პროტესტის ფორმაც მიიღო, რადგან მათი უმეტესობა საზოგადოებისათვის მწვავედ პრობლემურ საკითხებს ეხმაურება.

ასეა ამჯერადაც — გაგოშას ახალი სტენსილი, სახელწოდებით მშვიდობით, ჩემო ჭუჭყიანო ფეხსაცმელებო, ნინოწმინდის პანსიონში არსებულ სიტუაციას ეხმიანება.

"ყველა ბავშვი იმსახურებს დაცულ გარემოში ცხოვრებას", — წერია მხატვრის ფეისბუქგვერდზე გამოქვეყნებულ პოსტში.

აპრილის თვეში ნინოწმინდაში მდებარე საპატრიარქოს ბავშვთა პანსიონში სახალხო დამცველი, რომელიც წლებია, იქ არსებულ მდგომარეობაზე საუბრობს, არ შეუშვეს. ამის გამო ორგანიზაციამ პარტნიორობა ადამიანის უფლებებისთვის (PHR) თბილისის საქალაქო სასამართლოს მიმართა და მთავრობისგან ნინოწმინდის პანსიონში ყველა შესაბამისი უწყების მიერ მონიტორინგის ჩატარების უზრუნველყოფა მოითხოვა. მოთხოვნა სასამართლომ არა, თუმცა, გაერომ დააკმაყოფილა, შესაბამისად, მთავრობა ვალდებულია, უზრუნველყოს მონიტორინგი.

პანსიონის ყოფილი ბენეფიციარების მიერ ძალადობის შემთხვევებზე საუბრის შემდეგ შსს-მ გამოძიება დაიწყო.

4 ივნისს PHR-მა ნინოწმინდის პანსიონიდან ბავშვების გამოყვანის მოთხოვნით სასამართლოს მიმართა, რომელიც ორგანიზაციის განცხადებით, დაკმაყოფილდა.

ბოლო მონაცემებით, ნინოწმინდის პანსიონიდან ჯამში 24 ბავშვი გაიყვანეს.

ასევე იხილეთ: