"ალბათ არ შევცდები, თუ დღევანდელ პრეზენტაციას შევაფასებ, როგორც ყველაზე უინტერესო პარტიის დაფუძნებას, სამწუხაროდ", — ასე აფასებს ქართული ოცნების წევრი, შალვა პაპუაშვილი ყოფილი პრემიერმინისტრის, გიორგი გახარიას ახალი პოლიტიკური პარტიის პრეზენტაციას. ამის შესახებ პაპუაშვილმა იმედის ეთერში ისაუბრა.

"18 თებერვალი, როდესაც გიორგი გახარია გადადგა, ჩემთვის იყო განხიბლვა, დღეს იყო იმედგაცრუება. ვინაიდან ვნახეთ აბსოლუტურად უშინაარსო, ცარიელი სიტყვები, მათ შორის ისეთი შეფასებები, რომელიც ძალიან სამწუხაროა მოსმენა ქართული ოცნების მიმართ ადამიანისგან, რომელიც წლების განმავლობაში ქართული ოცნების ეგიდით იყო სხვადასხვა თანამდებობაზე. როდესაც საუბრობს, რომ ქართულმა ოცნებამ პარტიული ინტერესები დააყენა საქართველოზე მაღლა. ის, სავარაუდოდ, გულისხმობდა ნიკა მელიას დაკავების საკითხს და ასეთი შეფასება განსაკუთრებით იმედგამაცრუებელია", — აღნიშნა პაპუაშვილმა.

29 მაისს გიორგი გახარიამ თავისი ახალი გუნდის, პარტია საქართველოსთვის წევრები წარადგინა. ახალი პარტიის პოლიტსაბჭოში ქართული ოცნების და ხელისუფლების ყოფილი წარმომადგენლებიც ერთიანდებიან.

გიორგი გახარია პრემიერმინისტრობის თანამდებობიდან 18 თებერვალს გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას დაკავებას დაუკავშირა. მან ახსენა ისიც, რომ გუნდში ამაზე აზრთა სხვადასხვაობა იყო.

22 მარტს გახარია საზოგადოებასთან თანამდებობის დატოვების შემდეგ პირველად გამოჩნდა და თქვა, რომ "არსად წასვლას არ აპირებს, მეტიც, არც პოლიტიკიდან" მიდის. 14 აპრილს კი გახარიას გუნდის ახალმა წევრმა, გიორგი ხოჯევანიშილმა განაცხადა, რომ ისინი მომდევნო არჩევნებისთვის მზადებას დაიწყებენ და შესაბამისად, მონაწილეობასაც მიიღებენ.

ამ ეტაპზე გახარიას გუნდში ქართული ოცნების 6 ყოფილი დეპუტატია. მმართველი პარტიიდან წავიდნენ და ყოფილ პრემიერმინისტრს უერთდებიან: გიორგი ხოჯევანიშვილი, მიხეილ დაუშვილი, ანა ბუჩუკური, ალექსანდრე მოწერელია, ბექა ლილუაშვილი და შალვა კერესელიძე.

გარდა ამისა, გახარიას პოლიტიკურ პარტიას უერთდებიან NATO-ში საქართველოს ყოფილი ელჩი, ლევან დოლიძე, ყოფილი პრეზიდენტის, გიორგი მარგველაშვილის ადმინისტრაციის ხელმძღვანელი, გიორგი აბაშიშვილი, მთავრობის ადმინისტრაციის ორი ყოფილი ხელმძღვანელი ნათია მეზვრიშვილი და კახაბერ ქემოკლიძე.