საქართველოს ყოფილი პრემიერმინისტრისა და პარტია საქართველოსთვის თავმჯდომარის, გიორგი გახარიას თქმით, მათი მთავარი მიზანი ქვეყანაში რადიკალური დაპირისპირების დასრულებაა.

"ჩვენი მთავარი მიზანია, ამ ქვეყანაში დავასრულოთ რადიკალური დაპირისპირება — რადიკალიზმი ნებისმიერი სახის ჩემთვის პირადად და ჩემი მეგობრებისთვის, არაინაირი მნიშვნელობა არ აქვს, რომელი მხრიდან მოდის ეს რადიკალიზმი. ჩვენ არ ვითანამშრომლებთ არავისთან, სადაც რადიკალურ ტენდენციებს დავინახავთ, სადაც გადაწყვეტილების მიღების პროცესში რადიკალური ადამიანებიც იქნებიან ჩართულნი", — განაცხადა გახარიამ ექსპო ჯორჯიაში საკუთარი პარტიის დამფუძნებელი პრეზენტაციის დასრულების შემდეგ.

მან დღეს პარტიისა და გუნდის პრეზენტაცია ექსპო ჯორჯიაში გამართა. გახარის გუნდის პრეზენტაციის პარალელურად საპროტესტო აქცია მიმდინარეობდა.

აქტივისტები ადგილზე ბანერებით იყვნენ მისული და გახარიას ხელისუფლებაში ყოფნის დროს გადაცდომებზე საუბრობდნენ.

18 თებერვალს გიორგი გახარია პრემიერმინისტრობის თანამდებობიდან გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას საქმეს დაუკავშირა. მან ახსენა ისიც, რომ გუნდში ამაზე აზრთა სხვადასხვაობა იყო.

22 მარტს გახარია საზოგადოებასთან თანამდებობის დატოვების შემდეგ პირველად გამოჩნდა და თქვა, რომ "არსად წასვლას არ აპირებს, მეტიც, არც პოლიტიკიდან" მიდის. 14 აპრილს კი გახარიას გუნდის ახალმა წევრმა, გიორგი ხოჯევანიშილმა განაცხადა, რომ ისინი მომდევნო არჩევნებისთვის მზადებას დაიწყებენ და შესაბამისად, მონაწილეობასაც მიიღებენ.

ამ ეტაპზე გახარიას გუნდში ქართული ოცნების 6 ყოფილი დეპუტატია. მმართველი პარტიიდან წავიდნენ და ყოფილ პრემიერმინისტრს უერთდებიან: გიორგი ხოჯევანიშვილი, მიხეილ დაუშვილი, ანა ბუჩუკური, ალექსანდრე მოწერელია, ბექა ლილუაშვილი და შალვა კერესელიძე.

გარდა ამისა, გახარიას პოლიტიკურ პარტიას უერთდებიან NATO-ში საქართველოს ყოფილი ელჩი, ლევან დოლიძე და ყოფილი პრეზიდენტის, გიორგი მარგველაშვილის ადმინისტრაციის ხელმძღვანელი, გიორგი აბაშიშვილი.