ყოფილი პრემიერმინისტრის, გიორგი გახარიას გუნდისა და პოლიტიკური პარტიის პრეზენტაციის პარალელურად ექსპო ჯორჯიასთან საპროტესტო აქცია მიმდინარეობას. სამოქალაქო აქტივისტები ადგილზე ბანერებით არიან მისული და გახარიას ხელისუფლებაში ყოფნის დროს გადაცდომებზე საუბრობენ.

აქციაზე ევროპული საქართველოს ახალგაზრდული ფრთის და მოძრაობა შეცვალეს და საქართველოს წევრები არიან მისული. აქტივისტებს "გახარიას ცოდვების" პლაკატები უჭირავთ. ამასთან, აქტივისტებმა სიმღერა "გახარიას უხარია" ჩართეს, რომელიც 20 ივნისის აქციის დაშლას ეძღვნება.

"გახარია ვერასდროს დაჯდება იმ საერთო ოპოზიციური მაგიდის გარშემო, რომლის გარშემოც ჩვენ ყველანი ვსხედვართ ერთად ერთის წინააღმდეგ", — თქვა აქციის ერთ-ერთმა მონაწილემ, ნიკა ფარულავამ.

ფოტო: თამთა კახაბერიძე / On.ge

ფოტო: თამთა კახაბერიძე / On.ge

ფოტო: თამთა კახაბერიძე / On.ge

გიორგი გახარია პარტიისა და გუნდის პრეზენტაციას 17:00 საათზე გამართავს. როგორც ცნობილია, მის პარტიას საქართველოსთვის ერქმევა.

18 თებერვალს გიორგი გახარია პრემიერმინისტრობის თანამდებობიდან გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას საქმეს დაუკავშირა. მან ახსენა ისიც, რომ გუნდში ამაზე აზრთა სხვადასხვაობა იყო.

22 მარტს გახარია საზოგადოებასთან თანამდებობის დატოვების შემდეგ პირველად გამოჩნდა და თქვა, რომ "არსად წასვლას არ აპირებს, მეტიც, არც პოლიტიკიდან" მიდის. 14 აპრილს კი გახარიას გუნდის ახალმა წევრმა, გიორგი ხოჯევანიშილმა განაცხადა, რომ ისინი მომდევნო არჩევნებისთვის მზადებას დაიწყებენ და შესაბამისად, მონაწილეობასაც მიიღებენ.

ამ ეტაპზე გახარიას გუნდში ქართული ოცნების 6 ყოფილი დეპუტატია. მმართველი პარტიიდან წავიდნენ და ყოფილ პრემიერმინისტრს უერთდებიან: გიორგი ხოჯევანიშვილი, მიხეილ დაუშვილი, ანა ბუჩუკური, ალექსანდრე მოწერელია, ბექა ლილუაშვილი და შალვა კერესელიძე.

გარდა ამისა, გახარიას პოლიტიკურ პარტიას უერთდებიან NATO-ში საქართველოს ყოფილი ელჩი, ლევან დოლიძე და ყოფილი პრეზიდენტის, გიორგი მარგველაშვილის ადმინისტრაციის ხელმძღვანელი, გიორგი აბაშიშვილი.