ექსპრემიერმა, გიორგი გახარიამ თავისი პარტიის წარდგენაზე სიტყვით გამოსვლისას უკვე კარგად ნაცნობი, მისი ამოჩემებული ფრაზა "ჩვენ ყველას კარგად უნდა გვესმოდეს" 23-ჯერ თქვა. გახარია ამ ფრაზას იყენებდა სხვადასხვა ვარიაციით და ხანდახან მოკლედ "უნდა გვესმოდეს" ან "კარგად გვესმოდეს" ამბობდა.

იყო რამდენიმე მომენტიც, როცა პრემიერმა ეს ფრაზა წინადადებაში 2-3-ჯერ თქვა.

"ყველას კარგად უნდა გვესმოდეს, რომ სიმართლის ძალა მდგომარეობას იმაში, რომ ჩვენ არ უნდა ვიცხოვროთ ილუზიაში. ხანდახან პოლიტიკური კულტურა, ველი გვაცხოვრებს ამ ილუზიაში, როდესაც პოლიტიკურ ძალებს, პარტიებს შორის კინკლაობა, ჩხუბი, შეიძლება ვიღაცას ეგონოს, რომ რაიმეს მომტანია ქვეყნისთვის. არა, სინამდვილეში კარგ შემთხვევაში ჩვენ ერთ ადგილს ვტკეპნით, ცუდ შემთხვევაში ქვეყანა იხევს უკან.

ჩვენ ყველას კარგად უნდა გვესმოდეს, რომ ჩვენს გასაკეთებელს არავინ და ვერავინ გააკეთებს. ყველას კარგად უნდა გვესმოდეს, რომ მიზნების მისაღწევად გვექნება ბევრი საშრომი და მძიმე გადაწყვეტილებებია მისაღები", — პირველად სწორედ ამ წინადადებებში გამოიყენა პრემიერმა თავისი ფრაზა და ამის შემდეგ კიდევ 20-ჯერ გაიმეორა.

ექსპრემიერის აზრით, "ყველას კარგად უნდა გვესმოდეს", რომ მრავალფეროვნება ჩვენი სიძლიერეა, რომ რესურსებზე თანაბარი წვდომა აუცილებელია და ისიც, რომ პოლიტიკური დაპირისპირება ქვეყანას ვნებს. მისივე აზრით, "ყველას კარგად უნდა გვესმოდეს", რომ მთავარი გამოწვევაა სახელმწიფო ინსტიტუტების სისუსტეა და ამ მხრივ სამუშაოა.

"დამოუკიდებლობის მოპოვების დღეიდან, ბოლო 30 წლის განმავლობაში, ნებისმიერი ჩვენი ახალი ხელისუფლება პირველი რასაც აკეთებდა დაბეჯითებით ანგრევდა მისი წინამორბედის დატოვებულ შთამომავლობას. იმის და მიუხედავად რამდენად გონივრული ან კარგი იყო ეს შთამომავლობა. ყველას კარგად უნდა გვესმოდეს, რომ ეს იყო ძირითადი მიზეზი ქვეყნის ერთ ადგილას დგომის.

ჩვენ ყველას კარგად უნდა გვესმოდეს და მაგალითად, რომ შევადაროთ და ჩავთვალოთ, რომ ჩვენ ყველანი ერთად ვაშენებთ სახლს და ჩავთვალოთ, რომ თითოეული ხელისუფლების ვალდებულებაა ერთი სართული მაინც დააშენოს წინა ხელისუფლების დატოვებულ შთამომავლობას, ამ შემთხვევაში ყველას კარგად უნდა გვესმოდეს, რომ ნებისმიერი ახალი ხელისუფლება ყველანაირი გონივრულობის ფარგლების მიღმა, როცა იწყებს წინამორბედის დატოვებული შთამომავლობის ნგრევას, რა თქმა უნდა ქვეყანას უსპობს განვითარების პერსპექტივას", — ამბობდა ის.

გახარიას სიტყვით გამოსვლა, დაახლოებით ნახევარი საათი გაგრძელდა. ამ ფრაზის 23-ჯერ თქმა მან გუნდის წევრების წარდგენამდე მოასწრო.

დღეს გიორგი გახარიამ თავისი ახალი გუნდის, პარტია საქართველოსთვის წევრები წარადგინა. ახალი პარტიის პოლიტსაბჭოში ქართული ოცნების და ხელისუფლების ყოფილი წარმომადგენლებიც ერთიანდებიან.

გაიგეთ მეტი: