ნამახვანჰესის მშენებლობის მოწინააღმდეგე აქტივისტის, ვარლამ გოლეთიანის განცხადებით, მათ აქციებზე თითოეული ადამიანისა და სხვადასხვა ჯგუფის ინტერესი დაცულია და დაცული იქნება.

"ჩვენ საზოგადოების სხვადასხვა ჯგუფის ურთიერთობის უმნიშვნელოვანესი პრეცედენტი შევქმენით და ეს არის ქვაკუთხედი იმ დიდი გაერთიანების, რომელიც ამ მოძრაობას უნდა მოჰყვეს. თუ დავიყოფით სხვადასხვა ჯგუფად, დავუპირისპირდებით ერთმანეთს, ბუნებრივია, ეს ვერ იქნება სახალხო მოძრაობა, ვერ იქნება დაცული თითოეული მოქალაქის კონსტიტუციური უფლება და ვერ იქნება მათი ხმა გათვალისწინებული. ამიტომ, ამ ნაწილში პატივი უნდა ვცეთ ერთმანეთს და ჩვენ დავიცავთ აქ მოსული, თითოეული ადამიანის უფლებას, რომელიც მათი კონსტიტუციური უფლებაა", — განაცხადა გოლეთიანმა.

მისივე თქმით, ისინი არ იკრიბებიან ერთმანეთის გამოსასწორებლად, არამედ საკითხების გადასაწყვეტად იკრიბებიან.

"და ყველას ვთხოვთ, განსაკუთრებულად გაითავისოს ეს ყველაფერი. ამავდროულად, აქ დაცულია თითოეული ადამიანისა და ჯგუფის ინტერესი. როცა საუბარია, მათ შორის, არ იქნას გამოყენებული სხვადასხვა სიმბოლიკა, ეს იქნება პარტიული თუ სხვა კუთვნილების ამსახველი, ეს ემსახურება იმას, რომ არ მოხდეს უბრალოდ პროვოცირება დაპირისპირების და ჩვენმა მოწინააღმდეგე ძალებმა ეს პროვოკაციისთვის არ გამოიყენონ.

რაც შეეხება ძალადობას, გოლეთიანმა აღნიშნა, რომ ეს არ არის ქრისტიანული მოვლენა და ისინი ძალადობის ყოველგვარ გამოვლინებას კატეგორიულად ემიჯნებიან.

• ნურავინ იძალადებს, რადგან ძალადობა არ შეიძლება და ნურავინ მისცემს ძალადობის საფუძველს — მუსელიანი

24 მაისს ნამახვანჰესის საწინააღმდეგო აქციაზე მისულ სირცხვილიას აქტივისტებს, სალომე ბარკერსა და ზუკა ბერძენიშვილს ადგილზე მყოფი ძალადობრივი და ჰომოფობიური ჯგუფის წევრები დაუპირისპირდნენ. ალექსანდრე ფალავანდიშვილი აქტივისტს პროვოკატორს უწოდებდა, უყვიროდა და ლგბტ სამკლაურის მოხსნას მოითხოვდა.

რიონის ხეობის მცველების მაისურებით მყოფმა პირებმა კორიდორი გააკეთეს, რომ აქტივისტებს ტერიტორია დაეტოვებინათ. ამ დროს ერთ-ერთი მათგანი აქციის მონაწილებს მიმართავდა: "პროვოკაციაზე ნუ ყვებით. გაუშვით არაფერი ხდება".

როგორც სირცხვილიას აქტივისტებმა აღნიშნეს აქციაზე ჰესის მშენებლობის მოწინააღდეგეთა მხარდასაჭერად იყვნენ მისული, რადგან ხელისუფლებისთვის მიცემული ულტიმატუმის ვადა ამოიწურა და პროტესტის მხარდაჭერას აპირებდნენ. ბარკერმა განაცხადა, რომ ამ სამკლაურს უკვე ორი წელია ატარებს და "პროვოკაციისთვის" არ გაუკეთებია და არც მის მოხსნას აპირებს.

აქტივისტები დაპირისპირებული ჯგუფებიდან პოლიციამ გამოიყვანა. საბოლოოდ მათ აქცია დატოვეს.

აქციის ორგანიზატორმა, ვარლამ გოლეთიანმა მომხდარი ინციდენტის შეფასებისას დაპირისპირების მიზეზად ლგბტ სამკლაური წარმოაჩინა და არა აგრესიული ჯგუფები. მან ზოგადად ძალადობა და იქ მომხდარი დაპირისპირება დაგმო, თუმცა განაცხადა, რომ "გამომწვევი მიზეზი" შეიძლება სიმბოლიკა გახდეს.

გოლეთიანს სიმბოლიკის გამოყენებაზე განცხადება აქამდეც გაუკეთებია, თუმცა პარტიული სიმბოლიკის გამოყენებას კრძალავდა და ამბობდა, რომ არ სურდა პროტესტი რომელიმე პარტიასთან ყოფილიყო ასოცირებული. 23 მაისს გამართულ აქციაზე მყოფებს მხოლოდ საქართველოს სახელმწიფო დროშებისა და პირველი რესპუბლიკის დროშების მიტანა შეეძლოთ. მათი დიდი ნაწილი ადგილზე მისული იყო ჯვრებით, ხატებითა და სხვა ქრისტიანული სიმბოლიკით.