დაავადებათა კონტროლის ცენტრის დირექტორის, ამირან გამყრელიძის განცხადებით, თბილისში სინოვაკზე უკვე 15 000 ადამიანია ჩაწერილი და მოთხოვნა იზრდება. მისი თქმით, ამ დღეებში თბილისში დაემატება კაბინეტების რაოდენობა.

"რეგიონებში არის ადგილები, თბილისში პრობლემებია, ამიტომ ამ დღეებში თბილისში ინტენსიურად უნდა დაემატოს კაბინეტების რაოდენობა, დაახლოებით 10-დან 20-მდე, რომ მიწოდება თბილისში გავზარდოთ", — განაცხადა მან.

მისივე თქმით, აცრების 70% დედაქალაქზე მოდის და მოთხოვნა ჭარბობს მიწოდებას, განსაკუთრებით კი სინოვაკზე. მისივე თქმით, სინოფარმისა და ასტრაზენეკას შემთხვევაში სიტუაცია ნორმალურად აქვთ.

"გუშინ დამთავრდა სინოფარმის პირველ დოზებზე აცრა და 43 ათასამდე ადამიანმა გაიკეთა პირველი დოზა და დაიწყო დღეიდან მეორე დოზის ადმინისტრირება, რომელიც 22 ივნისისთვის უნდა იყოს ამოწურული. ასევე, თითქმის სრულად ამოწურულია ფაიზერის მეორე დოზები. დარჩა გარკვეული დოზები, რომლითაც იცრებიან სასწრაფოდ გადაუდებელი სამსახურის თანამშრომლები და მძიმე დაავადებით დაავადებული ადამიანები", — განაცხადა გამყრელიძემ.