კომპანია ლეგო LGBTQ+ თემის მხარდასაჭერად ახალ კომპლექტს გამოუშვებს. კომპლექტი 11 ფერსა და ფიგურას აერთიანებს. ფერები LGBTQ-ის ცნობილი დროშის მიხედვითაა შექმნილი, დამატებით, ღია ცისფერი, თეთრი და ვარდისფერი ტრანსგენდერ ადამიანებს წარმოადგენს, შავი და ყავისფერი კი კანის ფერისა და წარმომავლობის აღსანიშნავადაა გამოყენებული.

ახალი კომპლექტის სახელია Everyone Is Awesome. მისი შემქმნელი დიზაინერი მეთიუ ეშტონია, რომელმაც კომპლექტი საკუთარი სამუშაო მაგიდისთვის შექმნა.

"ყოველთვის მეუბნებოდნენ რითი უნდა მეთამაშა, როგორ მევლო, როგორ მელაპარაკა, რა ჩამეცვა — გაზრდისას სხვებისგან ყოველთვის იმ შეტყობინებას ვიღებდი, რომ "არასწორი" ვიყავი. იმად თავის მოჩვენება, რაც არ ვარ, ძალიან დამღლელი იყო. ნეტავ, ბავშვობისას სამყაროსთვის შემეხედა და მეფიქრა: 'ყველაფერი კარგად იქნება, რადგან ჩემთვის ადგილი მოიძებნება". ნეტავ, მეც შემხვედროდა განცხადება იმის შესახებ, რომ ყველა მაგარია [Everyone Is Awesome]", — ამბობს მეთიუ ეშტონი.

ეშტონის ნამუშევარმა სხვების ყურადღება მალევე მიიქცია და დიდი მოწონებაც დაიმსახურა. სწორედ ამიტომ კომპანიამ გადაწყვიტა, LGBTQ+ თემისთვის მხარდაჭერა ახალი კომპლექტის გამოშვებითაც გამოეცხადებინა.