ცენტრალური საარჩევნო კომისიის წინასწარი შედეგებით, ზუგდიდის რაიონის სოფელ კორცხელში, სადაც ნაციონალური მოძრაობის მხარდამჭერები და ლიდერები სცემეს, ადგილობრივი თვითმმართველობის არჩევნები ენმ-ს კანდიდატმა ვარადებულ ლაშხიამ მოიგო. მან ხმების 49.76% მოაგროვა, სულ - 623 ხმა. ქართული ოცნების კანდიდატმა ამირან ლაგვილავამ კონკურენტზე 10 ხმით ნაკლები, 613 ხმა მიიღო. არჩევნებში მონაწილე მესამე, თავისუფალი საქართველოს კანდიდატმა კი, მხოლოდ 16 ხმა.

ცესკოს ინფორმაციით, ყველაზე დიდხანს ხმის დათვლის პროცესი სწორედ კორცხელის საარჩევნო უბანზე გაგრძელდა, იქ რამდენჯერმე დაითვალეს ხმები.

22 მაისს საქართველოს 9 მაჟორიტარულ ოლქში გაიმართა ადგილობრივი თვითმმართველობის არჩევნები. ოლქების უმრავლესობაში ქართული ოცნების კანდიდატებმა გაიმარჯვეს. ნაციონალური მოძრაობა ოცნებას 4 ოლქში დაუპირისპირდა, საიდანაც ერთი ოლქი მოიგო ზუგდიდში, ერთი კი - ოზურგეთში.