პარტია გირჩის ერთ-ერთი ლიდერის, იაგო ხვიჩიას თქმით, ამნისტიის კანონის შემუშავებაში მონაწილეობა ნაციონალური მოძრაობის თავმჯდომარემ, ნიკა მელიამაც უნდა მიიღოს. ასე გამოეხმაურა იგი ევროკავშირის მიერ მელიას გირაოს გადახას, რომელსაც თავად მელია იმ პირობით დათანხმდა, თუ პარტიები ამნისტიის კანონს გაითხოვდნენ.

"მე მგონია, რომ არა თუ უნდა გამოვითხოვოთ [ამნისტიის კანონი], არამედ ნიკა მელიამაც უნდა მიიღოს მონაწილეობა ამნისტიის დოკუმენტის შემუშავებაში ისე, რომ ჩვენ მოვახერხოთ შარლ მიშელის დოკუმენტის სრულად რეალიზება ამ თვალსაზრისითაც. უნდა ვიპოვოთ ის ადგილი და წერტილი, სადაც კონსენსუსს მივაღწევთ და ვიტყვით, რომ აი ეს მუხლი შესრულდა ისე, როგორც ეწერა იმ ხელშეკრულებაში. მე ასე წარმომიდგენია, თუმცა რას გადაწყვეტს ნიკა, ჩემთვის უცნობია", — განაცხადა ხვიჩიამ იმედის ეთერში.

იგი ამბობს, რომ მელიას მიერ ევროკავშირის გირაოზე დათანხმება თავისთავად ნიშნავს, რომ იგი უერთდება ევროპული საბჭოს პრეზიდენტის, შარლ მიშელის შეთანხმებას.

"გულწრფელი რომ ვიყო, მე ვფიქრობ, რომ ნიკა მელიას მხრიდან ევროკავშირის მიერ გირაოს გადახდის პირობის მიღება თავისთავად ნიშნავს ამ [შარლ მიშელის] დოკუმენტზე ხელმოწერას. მე ასე მგონია. ძალიან რთულად წარმომიდგენია, რომ ადამიანი ციხიდან გათავისუფლდეს ამ დოკუმენტის შესაბამისად და შემდეგ მისი ნაწილი არ იყოს", — აცხადებს იაგო ხვიჩია.

დღეს, 8 მაისს ევროკავშირმა ნიკა მელიას გირაოს თანხა გადაიხადა. გადარიცხვა საქართველოს ახალგაზრდა იურისტთა ასოციაციის შუამავლობით განხორციელდა.

ახლა პროკურატურამ უნდა მიმართოს სასამართლოს აღკვეთის ღონისძიების შეცვლის შუამდგომლობით, რათა მელიას პატიმრობა გირაოთი შეეცვალოს. პროკურატურაში აცხადებენ, რომ თანხა ჯერ არ ასახულა და როცა აისახება, დაიწყებენ შესაბამის პროცედურებს.

საქართველოს ახალგაზრდა იურისტთა ასოციაციაში განმარტავენ, რომ პროცედურების დასაწყებად თანხის ასახვა არაა საჭირო. მეტიც, საია-ს თავმჯდომარის, ნიკა სიმონიშვილის განმარტებით, პროკურატურას აქამდეც შეეძლო ამ პოროცედურის დაწყება.

გაიგე მეტი: