დღეს, 23 თებერვალს პარლამენტმა პირველი მოსმენით განიხილა და 89 ხმით 20 ის წინააღმდეგ მხარი დაუჭირა მოსმენების შესახებ საკანონმდებლო პაკეტს, კერძოდ საჯარო სამართლის იურიდიული პირის - საქართველოს ოპერატიულ-ტექნიკური სააგენტოს შექმნის შესახებ.

კანონპროექტის მიხედვით, სახელმწიფო უსაფრთხოების სამსახურის მმართველობის სფეროში შეიქმნება საჯარო სამართლის იურიდიული პირი - საქართვლოს ოპერატიულ-ტექნიკური სააგენტო.

კანონპროექტის განმარტებით ბარათში წერია, რომ სააგენტო თავისი კომპეტენციის ფარგლებში დამოუკიდებლად შეასრულებს მისთვის დაკისრებულ ამოცანებს. დაუშვებელი იქნება სააგენტოს საქმიანობაში სახელმწიფო უსაფრთხოების სამსახურის სტრუქტურული ქვედანაყოფების და თანამდებობის პირების უკანონო ჩარევა. კანონით გარანტირებული იქნება სააგენტოს მოსამსახურის დამოუკიდებლობა თავის სამსახურებრივ საქმიანობაში. სააგენტოს ხარჯები სახელმწიფო ბიუჯეტში გათვალისწინებული იქნება ცალკე ორგანიზაციული კოდით. საქართველოს სახელმწიფო ბიუჯეტში სააგენტოსთვის განკუთვნილი ხარჯების შემცირება წინა წლის შესაბამის მოცულობასთან შედარებით შესაძლებელი იქნება მხოლოდ სააგენტოს წინასწარი თანხმობით