დღეიდან იმერეთის რეგიონის მოსახლეობას საშუალება ექნება, კორონავირუსის შემდგომი ჯანმრთელობის მდგომარეობის მონიტორინგი და მკურნალობა ქუთაისის რეფერალურ ჰოსპიტლის ბაზაზე არსებულ კოვიდის შემდგომი ჯანმრთელობის მართვის ცენტრში გაიაროს.

მსოფლიო გამოცდილებამ აჩვენა, რომ კოვიდის შემდგომ ვირუსი ადამიანის ორგანიზმზე კვალს ტოვებს და მისი გართულებების მართვა ჯანმრთელობის მდგომარეობის შენარჩუნებისთვის მნიშვნელოვანია. გართულებები განსაკუთრებით ხშირია რისკ-ჯგუფში შემავალი ადამიანებისთვის, რომელთაც აღენიშნებათ შაქრიანი დიაბეტი, არტერიული ჰიპერტენზია, ჭარბი წონა, გულ-სისხლძარღვთა დაავადებები და ა.შ. ჯანმრთელობის მდგომარეობის შემოწმება რეკომენდირებულია მათთვისაც, ვისაც COVID-19-ის გადატანის შემდგომ ჩივილები არ აღენიშნებათ.

აღსანიშნავია, რომ ქუთაისის რეფერალურ ჰოსპიტალს კოვიდ ინფიცირებული პაციენტების მართვის კუთხით დიდი გამოცდილება აქვს და ამ მხრივ რეგიონში მნიშვნელოვან როლსაც თამაშბს. ეს დაწესებულება იყო ერთ-ერთი პირველი, რომელიც ინფექციასთან ბრძოლაში 144 საწოლით ჩაერთო და 1 800 მდე ინფიცირებული პაციენტი გამოაჯანმრთელა.

ჰოსპიტლის ბაზაზე არსებულ კოვიდის შემდგომი ჯანმრთელობის მართვის ცენტრში იმ პაციენტების ჯანმრთელობაზე, რომლებსაც კორონავირუსი აქვთ გადატანილი, ექიმების მულტიდისციპლინური გუნდი იზრუნებს. ცენტრში შესაძლებელია ამბულატორიული და, საჭიროების შემთხვევაში, სტაციონარული მომსახურების მიღება ერთ სივრცეში. დასაქმებული სამედიცინო პერსონალი გადამზადებულია ჯონ ჰოპკინსის უნივერსიტეტში მოღვაწე ექიმი-ინფექციონისტის დახმარების პროექტის დირექტორის, მამუკა მაჩაიძის და ჰოლანდიაში მოღვაწე ოჯახის ექიმის, ნინა ბაკაშვილის მიერ.

გარდა ამისა, ცენტრი სერვისებზე ხელმისაწვდომობის გაზრდის მიზნით მოსახლეობას მხარდაჭერის პროგრამის ფარგლებში უსასყიდლოდ შესთავაზებს თერაპევტის მომსახურებას.

ევექსის ჰოსპიტალური ქსელი, მოსახლეობისთვის სერვისზე გეოგრაფიული ხელმისაწვდომობის გაზრდის მიზნით, კოვიდის შემდგომ ჯანმრთელობის ცენტრებს ბათუმის სამედიცინო დაწესებულებების ბაზაზეც აამოქმედებს.


დამატებითი ინფორმაციის მისაღებად დარეკეთ ნომერზე 2 600 600 ან ეწვიეთ ვებ-გვერდს www.evexhospitals.ge