ამერიკის კინოაკადემია 26 თებერვალს 89-ედ გასცემს კინემატოგრაფიის ყველაზე მაღალი რანგის ჯილდოს, ოსკარს.

წელს ღონისძიების წამყვანი ჯიმი კიმელი იქნება, რომელსაც, როგორც გაირკვა, შოუს შემქმნელები $15 000-ს უხდიან. ამავე საქმიანობისთვის ელენ დეჯენერესმა $1 000 000 აიღო.

ერთ-ერთი გამოკითხვის მიხედვით, ამერიკელების 33%-მა არ იცის, რომ წელს შოუს წამყვანი ჯიმი კიმელი იქნება, თუმცა ამავე გამოკითხულთა 55% ABC-ზე შოუს ყურებას გეგმავს.

გაირკვა ისიც, რომ ოსკარის ბოლოდროინდელი წამყვანებიდან ამერიკელებს ყველაზე მეტად ელენ დეჯენერესი მოეწონათ - მან ხმების 23% დააგროვა.

ელენს მოჰყვება ბილი კრისტალი 15%-ით, კრის როკი 13%-ით, ნილ პატრიკ ჰარისი 11%-ით და ბოლოს ადგილზეა სეთ მაკფარლენი, რომელმაც ხმების მხოლოდ 7% მიიღო.

საინტერესოა, როგორ გაართმევს თავს ჯიმი კიმელი ამ საპასუხისმგებლო დავალებას. ამ ყველაფერს კი 26 თებერვალს, ტელეკომპანია GDS-ზე ღამის ორი საათიდან გავიგებთ.