სურსათის ეროვნული სააგენტო და გაეროს სურსათისა და სოფლის მეურნეობის ორგანიზაცია (FAO) მოსახლეობას მოუწოდებენ, საეჭვო ადგილებში ხორცის და კვერცხის შეძენისაგან თავი შეიკავონ.

ისინი ავრცელებენ რეკომენდაციებსაც, რომელთა გათვალისწინება სანდო პროდუქტის შეძენაში დაგეხმარებათ.

ხორცი

ამ რეკომენდაციების მიხედვით, ხორცის შეძენისას ყურადღება უნდა მიაქციოთ პროდუქტის ეტიკეტს, რომელზეც დატანილი უნდა იყოს შემდეგი ინფორმაცია:

  • ქვეყნის დასახელება (სადაც მდებარეობს სასაკლაო), სასაკლაოს აღიარების ან პირობითი აღიარების ნომერი (სადაც დაიკლა ცხოველი);
  • ხორცის დამზადების თარიღი.
  • თუ ხორცი მიღებულია საქართველოში დაბადებული, გაზრდილი ცხოველისგან ("წარმოშობა — საქართველო"), ეტიკეტზე მითითებული უნდა იყოს ცხოველის საიდენტიფიკაციო საყურე ნიშნის ნომერი;
  • თუ ხორცი იმპორტირებულია, ეტიკეტზე მითითებული უნდა იყოს იმპორტიორი ქვეყნის დასახელება;
  • სხვადასხვა წარმომავლობის ხორცი (საქონელი, ცხვარი, ღორი, თხა, ფრინველი) მაცივარში განცალკევებით უნდა იყოს განთავსებული;
  • ხორცი უნდა ინახებოდეს სუფთა, დახურულ მაცივარში, შესაბამისი ტემპერატურული რეჟიმის დაცვით, რომელიც განსაზღვრულია 2-დან 6-გრადუსამდე, ხოლო, შენახვის ვადაა 48 საათი;
  • ეტიკეტი გამოკრული უნდა იყოს, მომხმარებლისათვის თვალსაჩინო ადგილზე.

კვერცხი

სურსათის ეროვნულ სააგენტოში აცხადებენ, რომ სააღდგომოდ კვერცხზე გაზრდილი მოთხოვნისა და მომხმარებელთა ინტერესების დაცვის მიზნით, სარეალიზაციო ბაზარზე კონტროლს აქტიურად ახორციელებენ.

უწყების რეკომენდაციით, კვერცხის შეძენისას უნდა გაითვალისწინოთ:

  • კვერცხი უნდა იყოს მარკირებული;
  • ყურადღებით გაეცანით ეტიკეტს, სადაც მითითებულია როგორც კვერცხის ვარგისიანობის ვადა, ასევე ინფორმაცია მისი შენახვის, მათ შორის ტემპერატურული რეჟიმისა და რეალიზაციის პირობების შესახებ;
  • ნაჭუჭის მუქი ან თეთრი შეფერილობა კვერცხის უვნებლობას და ხარისხს არ განსაზღვრავს;
  • კვერცხის ნაჭუჭი არ უნდა იყოს დაბინძურებული და დაზიანებული;

რაც შეეხება უკვე შეძენილი კვერცხის შენახვას, სურსათის ეროვნული საგენტოს რეკომენდაციაა, რომ მაცივარში დახურულ კონტეინერში ხორცის, რძისა და თევზის პროდუქტებისგან განცალკევებით ინახებოდეს, ასევე, გამოყენებამდე კვერცხი კარგად უნდა გარეცხოთ.