ევროკავშირის წევრი სახელმწიფოების ელჩებმა (კორეპერი) შეჩერების მექანიზმსა და საქართველოსთვის უვიზო რეჟიმის მინიჭებას მხარი დღეს, 22 თებერვალს დაუჭირეს. ამის შესახებ რადიო თავისუფლების ბრიუსელის ბიუროს კორესპონდენტი რიკარდ იოზვიაკი წერს ტვიტერზე, რომელიც ასევე განმარტავს, რომ ევროკავშირის მინისტრები ორშაბათს, 27 თებერვალს დღევანდელ გადაწყვეტილებას დაადასტურებენ, იმავე კვირას კი განახლებულ დოკუმენტს ხელი მოეწერება.

მას შემდეგ, რაც ევროპარლამენტის პრეზიდენტი და ევროკავშირის საბჭოს თავმჯდომარე ქვეყნის შესაბამისი წარმომადგენელი მოაწერენ ხელს ცვლილებას, იგი ევროკავშირის ოფიციალურ ჟურნალში გამოქვეყნდება.

დოკუმენტის გამოქვეყნებიდან ზუსტად ოც დღეში, ბიომეტრიული პასპორტის მქონე საქართველოს მოქალაქეები შენგენის ზონაში უვიზოდ მიმოსვლას შეძლებენ.