ქართული ოცნების დეპუტატის, შალვა პაპუაშვილის განცხადებით, ნიკა მელიას დამოკიდებულება არასერიოზულია და თუ ის გირაოს გადახდაზე თანხმდება, თავად უნდა გადაიხადოს და არ უნდა დაელოდოს ევროკავშირს.

"დიდი ხანია უკვე, ნიკა მელია, ნაციონალური მოძრაობა და ევროპული საქართველო გასული არიან ყოველგვარი რაციონალური და რამე ასეთი დამოკიდებულებისგან. ჩვენ ვნახეთ, რომ ჩაეშალათ მათ მთელი მცდელობა დესტრუქციის. შედგა შეთანხმება შარლ მიშელის ინიციატივით. ახლაც ცდილობენ, რომ რამენაირად ეს შეთანხმების აღსრულება ჩაშალონ. ამის ნაწილია დღეს ეს [ნიკა მელიას] განცხადებაც. თუკი გირაოს თანხმდება ევროკავშირის, თავად რატომ არ იხდის ამ გირაოს, მე ვერ ვხვდები. მაგალითად, ამაზე პასუხი ჰქონდა ვინმეს? რომ თუკი თანახმაა, რომ გირაოთი გამოვიდეს, რაღატო ელოდება, რომ ევროკავშირმა გადაიხადოს გირაო? [...] ნიკა მელია რომ თანხმდება გირაოს, ეს იმის აღიარებაა, რომ ის რომ ამბობდა, რომ არ გადავიხდიო, არ იყო სწორი. [...] თუკი ის გირაოთი გამოსვლას თანხმდება, რატომ აწვალებს ევროკავშირს, გადაიხადოს თავად", — განაცხადა მან.

დღეს, 26 აპრილს ნაციონალური მოძრაობის თავმჯდომარემ, ნიკა მელიამ განცხადება გაავრცელა, სადაც ის მზადყოფნას გამოთქვამს ევროკავშირის მიერ გადახდილი გირაოთი გათავისუფლებაზე, იმ შემთხვევაში, თუ ამნისტიის კანონს უკან გაითხოვენ.

დოკუმენტში, რომელიც ევროპული საბჭოს პრეზიდენტის, შარლ მიშელის ინიციატივით შემუშავდა წერია, რომ მხარეებმა ხელმოწერიდან ერთი კვირის ვადაში, "პოლიტიზებულ მართლმსაჯულებად" აღქმულ ორ საკითხზე რეაგირება უნდა მოახდინონ ამნისტიის საშუალებით და/ან ისეთი ზომების მიღებით, რომელიც ანალოგიურ შედეგს გამოიღებს.

ამნისტიის საკითხს მოყვა არაერთი კითხვა იმაზე, თუ ვის შეეხება ეს კანონი. კერძოდ, სამოქალაქო საზოგადოებისა და ოპოზიციის ნაწილი წინააღმდეგია, რომ ის გავრცელდეს სამართალდამცავები უწყების წარმომადგენლებზეც, რომლებიც აქციის დაშლაში მონაწილეობდნენ. პარლამენტის თავმჯდომარის, არჩილ თალაკვაძის განცხადებით, ამნისტიის კანონი ზუსტად იმ პირობებით მიიღება, რაც შეთანხმებაშია. მისი თქმით, ქართულ ოცნებას ამ საკითხზე "არავითარი სუბიექტური ინტერესი" არ გააჩნია.

27 აპრილს, სამშაბათს, ოპოზიცია პარლამენტში შევა იმისთვის, რომ ამნისტიის შესახებ კანონი დაარეგისტრიროს. ამნისტია შეეხება ნაციონალური მოძრაობის თავმჯდომარეს, ნიკა მელიას. პროექტის დარეგისტრირების შემდეგ, ამავე დღეს პრეზიდენტი გიორგი რურუას შეწყალების აქტს გამოსცემს.

გაიგეთ მეტი: