რუსეთში გამოცემა Meduza "უცხოეთის აგენტად" გამოაცხადეს. ინფორმაციას თავად Meduza ავრცელებს. მედიის ცნობით, გადაწყვეტილებას, რომელიც რუსეთის იუსტიციის სამინისტრომ მიიღო, გაასაჩივრებენ.

Meduza ონლაინ გამოცემაა, რომელიც ლატვიაშია დარეგისტრირებული და რუსეთის მიმართ კრიტიკით გამოირჩევა. 2019 წლის 6 ივნისს რუსეთში Meduza-ს გამომძიებელი ჟურნალისტი, ივან გოლუნოვი დიდი ოდენობით ნარკოტიკული საშუალების გასაღების მცდელობის ბრალდებით დააკავეს. მის დაკავებას დიდი საზოგადოებრივი პროტესტი მოჰყვა. 11 ივნისს ბრალდების დაუდასტურებლობის გამო მის წინააღმდეგ სისხლისსამართლებრივი დევნა შეწყდა.

36 წლის ჟურნალისტი თავისი საგამოძიებო საქმიანობით არის ცნობილი. ის ხშირად მოსკოვის პოლიტიკურ ელიტაში კორუფციის ფაქტებს ამხელდა. გამოცემას სჯერა, რომ მისი დაკავება სწორედ მის საგამოძიებო საქმიანობას უკავშირდებოდა.