ვინი პუჰის საუკეთესო მეგობარი, გოჭუნა, ერთ მომენტში ხვდება, რომ მართალია, პატარა გული აქვს, თუმცა, მას უსაზღვრო მადლიერების და სიყვარულის დატევა შეუძლია.

ალბათ სწორედ ამ დასკვნამდე მივა მალე პატარა ირმულა, რომელიც ქვეყანას ერთი თვის წინ მოევლინა ბრისტოლის ზოოპარკში. სიმაღლეში იგი მხოლოდ 20 სანტიმეტრია, თუმცა, მისი ახალბედა მშობლები, ბრინი და ჯორა, მაინც ძალიან ამაყობენ შვილით.

როგორც მორცხვი პატარას მომვლელები აღნიშნავენ, ირმულამ ცოტა ხნის წინ დაიწყო სიახლეების აღმოჩენა და უკვე ტკბილი კარტოფილიც დააგემოვნა.

"ბრინი შესანიშნავი ახალბედა დედაა და ძალიან ყურადღებიანი შვილის მიმართ", — აღნიშნავს ზოოპარკის ერთ-ერთი თანამშრომელი, — "ერთი სანახაობაა მათი ყურება. აქეთ-იქით დადიან თავიანთი ფანქრისტოლა ფეხებით და ყვავილებსა და ბოსტნეულს გეახლებიან".

პატარა ირმულა დედასთან, ბრინთან, ერთად.

ფოტო: Bristol Zoo Gardens

ცხოველი, რომელსაც თაგვირემსაც უწოდებენ, ბოლო ათწლეულში ზოოპარკში დაბადებული მხოლოდ მეორე ირმულაა.

ირმულები უმეტესად სამხრეთ-აღმოსავლეთ აზიაში ბინადრობენ. ერთ-ერთი ყველაზე პატარა წყვილჩლიქოსანი ცხოველი ზრდასრულობისას, საშუალოდ, 1,5 კილოგრამს იწონის.