თაკო ჩარკვიანის თქმით, მას გული წყდება, რომ სტრატეგია აღმაშენებლის ლიდერმა, გიორგი ვაშაძემ ვახტანგ მეგრელიშვილისა და ალეკო ელისაშვილის გვერდით შარლ მიშელის ახალ დოკუმენტს ხელი მოაწერა. მისივე თქმით, ეს ის დოკუმენტი არ არის, რაზეც მას ვაშაძესთან უსაუბრია.

"მე გული მწყდება, რომ ჩემი გიორგი ვაშაძე, რომელზეც ძალიან დიდ იმედებს ვამყარებდი დღეს აღმოჩნდა ვახო მეგრელიშვილისა და ალეკო ელისაშვილის გვერდით იმ დოკუმენტზე ხელისმომწერი, რომელიც იმ საარჩევნო სისტემას, რომელიც მე და გიორგის ათსგზის გვისაუბრია ტექნოლოგიები და ციფრული ტექნოლოგიებით, ეს ის დოკუმენტი არ არის. ასე რომ, ჩვენგან ნუ ეწყინება. მე მას პრემიერობა შევთავაზე, მან ელისაშვილის გვერდით ყოფნა აირჩია. ეს უკვე მისი პრობლემაა", — თქვა ჩარკვიანმა TV პირველთან.

ტრატეგია აღმაშენებლის ლიდერ გიორგი ვაშაძის მიერ შარლ მიშელის ახალ დოკუმენტზე ხელმოწერის შემდეგ თაკო ჩარკვიანმა განაცხადა, რომ მისი და გიორგი ვაშაძის პოლიტიკური გზები "ძალაუნებურად გაიყო".

ჩარკვიანმა ხელმოწერა IPN-თან "პროცესის ღალატად" შეაფასა და თქვა, რომ "როცა ქართული ოცნება ჩამოშლის პროცესშია, ოპოზიცია მას არ უნდა შეყუდებოდა".

მისივე თქმით, დოკუმენტი ბუნდოვანია და მასზე ხელმოწერა იგივე წყალში შესვლას ნიშნავს.

IPN-ის ინფორმაციით, კითხვაზე, მიმართავს თუ არა პარლამენტს სადეპუტატო უფლებამოსილების შეწყვეტის მოთხოვნით კიდევ ერთხელ, თაკო ჩარკვიანმა განაცხადა, რომ რა პროცედურაც იქნება საჭირო, იმას გააკეთებს.

ევროპული საბჭოს პრეზიდენტის, შარლ მიშელის ახალ დოკუმენტს 19 აპრილს შვიდმა პოლიტიკურმა პარტიამ და სამმა დამოუკიდებელმა დეპუტატმა მოაწერა ხელი. ხელმოწერის ცერემონია პრეზიდენტის სასახლეში გაიმართა. ხელმოწერის ცერემონიას ონლაინ დაესწრო შარლ მიშელიც.

ამ დროის მონაცემებით, დოკუმენტს ხელს აწერენ: ქართული ოცნება, ლელო, სრატეგია აღმაშენებელი, ორივე გირჩი, რესპუბლიკური პარტია, ასევე, ინდივიდუალურად აწერენ ხელს ნაციონალური მოძრაობის ერთ-ერთი ლიდერი, სალომე სამადაშვილი, ევროპული საქართველოს ყოფილი თავმჯდომარე, დავით ბაქრაძე და ევროპული საქართველოს წევრი, რამაზ ახვლედიანი.

ახალ დოკუმენტში საუბარია პოლიტპატიმრებზეც. კერძოდ, საუბარია იმაზე, რომ დოკუმენტის ხელმოწერიდან ერთი კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სხვა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც ვადამდელ არჩევნებთან დაკავშირებით ქართული ოცნების წინადადება გაზიარებულია, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.

ამავე თემაზე: