კორონავირუსის საწინააღმდეგო ვაქცინაციაზე წინასწარი რეგისტრაცია დაიწყო. 18 წელზე ზემოთ ყველა მოქალაქეს შეეძლება წინასწარ დარეგისტრირდეს და ამისთვის რამდენიმე ნაბიჯი გაიაროს.

სარეგისტრაციოდ უნდა ეწვიოთ ჯანდაცვის სამინისტროს პორტალს ბმულზე — MOH.GOV.GE. თავდაპირველად უნდა მონიშნოთ, გსურთ თუ არა მიიღოთ ინფორმაცია, როცა კორონავირუსის ვაქცინაცია თქვენთვის შესაძლებელი გახდება და აირჩიოთ ფორმა, რომლითაც ინფორმაციას მოგაწვდიან.

ფოტო: ჯანდაცვის სამინისტრო

შემდეგ, უნდა აირჩიოთ მაქსიმუმ სამი ვაქცინა, რომელსაც უპირატესობას ანიჭებთ. ჩამონათვალს შორის არის:

  • Pfizer/BioN-Tech;
  • AstraZeneca/Oxford;
  • Moderna/Lonza;
  • Johnson & Johnson;
  • Novavax;
  • Sinopharm;
  • Sinovac Biotech Co.

მომდევნო ნაბიჯია პირადი ინფორმაციის შეყვანა, მათ შორის, პირადი ნომერი და დაბადების წელი, რის შემდეგაც თქვენს სახელ-გვარსა და დაბადების თარიღი პორტალი ავტომატურად აფიქსირებს.

ამის შემდგომ, უნდა შეიყვანოთ მობილურის ნომერი, სადაც მიიღებთ სარეგისტრაციო კოდს, რომელსაც ჩაწერთ მითითებულ გრაფაში. ბოლოს, შეგყავთ საკუთარი ელექტრონული მისამართი და აწვებით ღილაკს "რეგისტრაცია".

ფოტო: ჯანდაცვის სამინისტრ

ჯანდაცვის სამინისტროში აცხადებენ, რომ აღნიშნული პორტალის ამოქმედების მიზანი ვაქცინებთან დაკავშირებით მოქალაქეების ინტერესებისა და მოლოდინის შეფასებაა. ამაზე 7 აპრილს ისაუბრა ჯანდაცვის მინისტრმა, ეკატერინე ტიკარაძემაც. მისი თქმით, ეს კვლევა დაეხმარებათ მიიღონ სტრატეგიული გადაწყვეტილება იმაზე, თუ რა ვაქცინებს შემოიტანენ ქვეყანაში შემდგომ.