კარგი ამბავი გვაქვს მათთვის, ვინც Planet Earth II ნახა და აღფრთოვანდა. თუ BBC-ის გადაღებული 6 სერიიანი დოკუმენტური შოუ არ გეყოთ და გული დაგწყდათ, რომ კიდევ მეტი კადრები და ბუნების საოცრებები ვერ ნახეთ, ნუ დამწუხრდებით, მალე ახალ სერიალს იხილავთ.

BBC-ის ცნობით, წლის ბოლოს, დევიდ ატენბორო კიდევ ერთხელ გვამოგზაურებს ჩვენი პლანეტის უცნობ კუთხეებში და ბუნებას კიდევ უფრო ახლოს გაგვაცნობს. 2001 წელს გადაღებული სერიალის The Blue Planet მეორე სეზონი წლის ბოლოს გამოვა ტელეეკრანებზე.

შვიდ სერიიან დოკუმენტურ შოუს ბოლო ოთხი წლის განმავლობაში ყველა კონტინენტსა და ოკეანეში იღებდნენ და ფილმების ძირითადი ფოკუსი ახალი აღმოჩენებია. ახალი ტექნოლოგიების საშუალებით მაყურებელს მიკრო ორგანიზმების ცხოვრების ნახვის საშუალებაც ექნებათ.

სერიალში ასევე ვიხილავთ უნიკალურ ადგილებსაც. მათ შორის, მეთანის ვულკანებს მექსიკის ყურეში და ანტარქტიდის სიღრმეებს.