საქართველოს ბანკი მათ ერთ-ერთ ფილიალში სავარაუდო შეიარაღებული თავდამსხმელის შეჭრას ეხმიანება და აცხადებს, რომ ყველაფერს გააკეთებენ უსაფრთხოების უზრუნველსაყოფად.

"ჩვენთვის მნიშვნელოვანია ჩვენი თანამშრომლებისა და მომხმარებლის უსაფრთხოება და შესაძლებლობების ფარგლებში გავაკეთებთ ყველაფერს მათი უსაფრთოებისთვის", — განუცხადეს საქართველო ბანკში On.ge-ს.

თბილისში, ავლაბრის მეტროს მიმდებარედ, საქართველოს ბანკის შენობაში, სავარაუდოდ, შეიარაღებული პირი შეიჭრა. დაუდასტურებული ინფორმაციით, შიგნით არიან მძევლებიც. შენობაში, სადაც ბანკი მდებარეობს სარემონტო სამუშაოები მიმდინარეობს, შესაბამისად, უცნობია, ფუნქციონირებდა თუ არა ეს სერვისცენტრი.

ადგილზე მობილიზებულია პოლიცია. მეტროსადგური ავლაბარი დაკეტილია. სამართალდამცავებმა მიმდებარე ტერიტორია დაატოვებინეს მოქალაქეებს.

ამ ეტაპზე შინაგან საქმეთა სამინისტროსა და საქართველოს ბანკში დამატებით კითხვებს არ პასუხობენ.