საქართველოს პარლამენტის უმრავლესობის წევრი ქართული ოცნებიდან, მამუკა მდინარაძე ტელეკომპანია რუსთავი 2-ის დირექტორს ნიკა გვარამიას ტელევიზიების გათიშვის დიდოსტატს უწოდებს. ასე შეაფასა მდინარაძემ ტელეკომპანიის მიერ, გუშინ საღამოდან პროტესტის ნიშნად გადაცემების შეჩერება.

"მას [ნიკა გვარამია], ალბათ, ეგონა, რომ ვიღაც შეუვარდა და ვიღაც დახურავდა, ვიღაც გათიშავდა. ეს მოლოდინი არ გაუმართლდა და თვითონ გააკეთა ეს ყველაფერი. ამაზე მეტი კომენტარი რა უნდა გავაკეთო, როდესაც ჩანს ვისი სტილია პროვოკაციები, ვისი სტილია გათიშვები, ვისი სტილია ის, რომ რაღაც დესტაბილიზაციის ფონი შექმნას და ამით გარკვეული ზეგავლენა მოახდინოს ადამიანების ფსიქოლოგიაზე," - განაცხადა მამუკა მდინარაძემ რუსთავი 2-ის მიერ გადაცემების შეჩერებაზე.

ტელეკომპანია რუსთავი 2-მა პროტესტის ნიშნად გადაცემები 17 თებერვალს, 23:40 წუთიდან შეწყვიტა. ამ დროიდან სამ არხზე (რუსთავი 2, მარაო და კომედი არხი) და ვებგვერდზე გამოტანილია წარწერა - "ვაპროტესტებთ უსამართლობას". მაუწყებლობის შეწყვეტის შესახებ განცხადება არხის წამყვანმა და გენერალური დირექტორის მოადგილემ, ზაალ უდუმაშვილმა კურიერის სპეციალურ გამოშვებაში გააკეთა.