ტელეკომპანია რუსთავი 2-მა პროტესტის ნიშნად გადაცემები შეწყვიტა. 23:40 წუთიდან ეკრანზე გამოტანილია წარწერა - "ვაპროტესტებთ უსამართლობას". მაუწყებლობის შეწყვეტის შესახებ განცხადება არხის წამყვანმა და გენერალური დირექტორის მოადგილემ, ზაალ უდუმაშვილმა კურიერის სპეციალურ გამოშვებაში გააკეთა.

"ჩვენ ისევ პირდაპირ ეთერში ვბრუნდებით, თუმცა, ეს ის შემთხვევაა, როცა ეს სტუდია არ ჩაირთო იმ მიზნით, რომ ქვეყანაში მიმდინარე მთავრი მოვლენები გააშუქოს. მე მინდა რუსთავი 2-ს სახელით ერთი მნიშვნელოვანი განცხადება გავაკეთო - გვერწმუნეთ, ამ გადაწყვეტილების მიღება არ იყო ჩვენთვის ადვილი. ეს არის პროტესტის უკიდურესი ფორმა, რომელსაც შესაძლოა ტელევიზიამ მიმართოს, თუმცა, ჩვენ დღეს სხვა გამოსავალი აღარ დაგვიტოვეს. ჩვენი დუმილით შევეცდებით ხმა ყველას მოგაწვდინოთ. დღეიდან, უფრო ზუსტად კი, ამ წუთიდან რუსთავი 2 გადადის საპროტესტო მაუწყებლობაზე. ყველას გელოდებით სამის ნახევარზე, რუსთაველზე, პარლამენტის შენობის წინ, ერთად დავიცვათ რუსთავი 2 და სიტყვის თავისუფლება," - ასე აცნობა უდუმაშვილმა არხის პროტესტის შესახებ მაყურებელს.

რუსთავი 2-სგან ინფორმაციის მიღება შეუძლებელია არხის ვებგვერდზეც. პროტესტის დაწყების შემდეგ, ვებგვერდზეც მხოლოდ "ვაპროტესტებთ უსამართლობას" ჩანს.

ფოტო: ფოტო ვებგვერდიდან/რუსთავი 2