ლელოს ერთ-ერთი ლიდერის, მამუკა ხაზარაძის განცხადებით, გია ვოლსკიმ დღევანდელი უხამსი შინაარსის ჟესტის გამო თანამდებობა უნდა დატოვოს.

"ის უტიფარი საქციელი, რაც დღეს ბატონმა გია ვოლსკიმ ჩაიდინა ჩვენი შვილები მიმართ, მან შეურაცხყოფა მიაყენა სრულიად საქართველოს, მან შეურაცხყოფა მიაყენა ახლგაზრდა ადამიანებს, გოგოებს და ბიჭებს, მან ისეთი ჟესტი გააკეთა, რომ მისი ადგილი პარლამენტში არ უნდა იყოს, მან უნდა დატოვოს სასწრაფოდ თანამდებობა. ნორმალურ ქვეყანაში ასეთი ადამიანი სასწრაფოდ უნდა იხდიდეს ბოდიშს და მიდიოდეს თანამდებობიდან, ტოვებდეს მანდატს. თუ ის ასე არ გააკეთებს, ნიშნავს, რომ ქართული ოცნებაც იზიარებს ასეთ ენაზე კომუნიკაციას საზოგადოებასთან", — განაცხადა ხაზარაძემ ფორმულას ეთერში.

ქართული ოცნების დეპუტატმა, გია ვოლსკიმ აქტივისტებს უხამსი შინაარსის გამომხატველი ჟესტი უჩვენა. ვოლსკი მმართველ პარტიაში ჩანიშნულ უმრავლესობის სხდომაზე მივიდა, რა დროსაც აქტივისტები მას შეძახილით — "მონა" დახვდნენ. სწორედ ამის შემდეგ გააკეთა უხამსი ჟესტი აქციის მონაწილეების მიმართულებით ქართული ოცნების ერთ-ერთმა ლიდერმა.