ბოლო წლებში ადამიანებმა თავიანთი მენტალური ჯანმრთელობის შესახებ უფრო ხმამაღლა დაიწყეს საუბარი. იქმნება ჯგუფები, პლატფორმები, სადაც ისინი ერთმანეთს რჩევებსა და ისტორიებს უზიარებენ. მათ შორის, არაერთი კითხვა ისმება იმაზე, თუ ვინაა საუკეთესო თერაპევტი და ვისთან შეიძლება მივიდეთ, როცა ვგრძნობთ, რომ პროფესიონალის დახმარება გვჭირდება.

თუმცა, რჩევები ყოველთვის სასარგებლო არაა და ის, რამაც სხვის შემთხვევაში გაამართლა, შეიძლება ჩვენს ვითარებას სულაც არ შეეფერება. ჩნდება კითხვებიც: როგორ მივხვდეთ, რამდენად გვეხმარება თერაპევტი ან რა არის ის "წითელი ხაზი", რომელიც მან არავითარ შემთხვევაში არ უნდა გადაკვეთოს?

ამის გასაგებად მენტალური ჯანმრთელობის ფორუმში კითხვა დავსვით და საინტერესო პასუხებიც მივიღეთ.

1. თუ გკიცხავს — "კაი რაა, ეგ რამ გაგაკეთებინა" ან "მაგ განცდით ცხოვრება არ გიჭირს?"

რავი, წავალ, მოვიკლავ თავს.

2. რაღაც ისტორიას რომ უყვები და ჩაგეკითხება: თინათინი რომელი? ავგაროზაშვილი? ვიცნობ..

სახელი და გვარი პირობითია, მაგრამ რაც არ უნდა იყოს, მოდი, ნუღა გავაგრძელებთ.

3. თუკი გეფლირტავება

შევთანხმდეთ, რომ ამისთვის ფულს არ გიხდი და ტოქსიკური ურთიერთობების დანაკლისსაც არ განვიცდი!

4. თუ გეტყვის, ეს სიტუაცია ჩემს კომპეტენციაში არ შედის და ჩემი დაქალის ნომერს მოგცემო

მერე საღამოს ყავაზე დასხდებით და ჩემს აშლილობებზე იხუმრებთ????

5. თუ მობილურს სქროლავს

ნამდვილად მისმენ, ხომ? აბა, გაიმეორე, ბოლოს რა ვთქვი. მიდი. გაიმეორე.

6. თუ გეუბნება, რომ ეკლესიაში სიარული გიშველის

კარგი, მამაო

7. თუ ფულის სესხებას გთხოვს

ჰა?

8. თუ სესიისთვის დათქმულ დროს ხშირად გადაგინაცვლებს

დავიჯერო, ჩემზე მეტი პრობლემა გაქვს ცხოვრებაში?

9. როცა გიმეგობრდება, ყველა შენი ქრაშის სახელი იცის და ზოგიერთებს მხარსაც უჭერს

ვინ გთხოვა???

10. თუ გეუბნება, რომ მოგცლია და სხვები შენზე უარესადაც ყოფილან

ეს პასუხი არ გვაწყობს.

ბონუსი: თუ სრული სერიოზულობით გეკითხება — "თქვენ ვერძი ხართ, ხომ?"

გამოიხურე კარი და უკან აღარ დაბრუნდე!

თუ ფსიქიკური ჯანმრთელობის შესახებ მეტი ინფორმაციის მიღება და დისკუსიებში ჩაბმა გსურს, შემოუერთდი მენტალური ჯანმრთელობის ფორუმს.

Responsible.ge ევროპაბეთის პლატფორმაა, რომელიც საზოგადოებაში აზარტული თამაშების შესახებ ცნობიერების ამაღლებასა და პასუხისმგებლიანი თამაშის პოპულარიზაციას ემსახურება. ამასთანავე, პლატფორმის დახმარებით, შეგიძლიათ, გაეცნოთ პასუხისმგებლიანი თამაშის ხელსაწყოებსა და ანგარიშებს, ასევე ინფორმაციას ევროპაბეთის პასუხისმგებლობის შესახებ საზოგადოების მიმართ, ბიზნესსა და კომუნიკაციაში.