მეგი ბაქრაძის ოჯახის ადვოკატების განცხადებით, ახალციხის კლინიკაში შედგენილ ფორმა 100-ში ვაქცინაციის რეალური დრო არ არის მითითებული. მათი თქმით, ეს კითხვის ნიშნის ქვეშ აყენებს სამედიცინო დოკუმენტს, ამიტომ მიაჩნიათ, რომ გამოძიება დოკუმენტის შესაძლო გაყალბების საქმეზეც უნდა დაიწყოს.

"რამდენიმე დღის წინ მოხდა იდენტიფიცირება ძალიან მნიშვნელოვანი ფაქტის, რაც არის ვაქცინაციის ზუსტი დრო. ახალციხის კლინიკის მიერ შედგენილ ფორმა 100-ში ვაქცინაციის დროდ მითითებულია 12:30 საათი, მაშინ, როცა რეალურად ვაქცინაცია მოხდა 12:13 საათზე. ფორმა 100-ის თანახმად, მეგის გამოუვლინდა ჩივილები და ამ მომენტიდან 15 წუთში, 13:10 საათზე მას რეანიმატოლოგის მიერ დახმარება გაეწია. თუმცა, იმის გათვალისწინებით, რომ რეალური ვაქცინაციის დრო არის 12:13 წუთი, გამოდის, რომ მას რეანიმატოლოგის დახმარება გაეწია 32 წუთში.

აქ მნიშვნელოვანია გვესმოდეს ისიც, რომ ეს ფაქტობრივი უზუსტობა, მთლიანად კითხვის ნიშნის ქვეშ აყენებს სამედიცინო დოკუმენტს — ფორმა 100-ს და ახალციხის კლინიკაში შედგენილ სამედიცინო ისტორიას. მიგვაჩნია, რომ გამოძიება უნდა დაიწყოს სამედიცინო დოკუმენტის შესაძლო გაყალბების ფაქტის შესახებ", — განაცხადა ადვოკატმა ბრიფინგზე.

მისივე თქმით, პარალელურად გამოძიებას ატარებს AstraZeneca-ც და ეს სამედიცინო დოკუმენტი საჭირო იქნება მათი გამოძიების ფარგლებშიც. თუმცა ადვოკატი კიდევ ერთხელ მიუთითებს, რომ ამ წუთისთვის დოკუმენტაციის სანდოობა ეჭვქეშ დგას.

"უნდა გვესმოდეს, იმის გამო, რომ 17-წუთიანი სხვაობა არის რეალურ ფაქტსა და ექიმის მიერ აღწერილ მოვლენას შორის, უკვე კითხვის ნიშნის ქვეშ დგება სრულიად სამედიცინო მომსახურება, იქნება ეს მეგისთვის მიცემული წამლები, თუ ამ წამლების მიცემის დრო და შემდგომ უკვე რეანიმატოლოგის დახმარება", — თქვა მან.

გარდა ამისა, ადვოკატის განცხადებით, ამ დრომდე საგამოძიებო უწყებას არ ამოუღია გარდაცვლილი ექთნის პირადი ტელეფონი. მისი თქმით, ამ ტელეფონში არსებობს სამსახურეობრივი ჩატი, სადაც თანამშრომლები საუბრობენ, რომ ექთნის გარდაცვალების რეალური მიზეზები იციან.

"ამ ტელეფონში არსებობს კომუნიკაცია, რომლის ფარგლებშიც, გარკვეული პირები აცხადებენ, რომ ფლობენ ზუსტ ინფორმაციას, რატომ გარდაიცვალა მეგი და რა მოხდა რეალურად. ამ ტელეფონს დღეს გადავცემთ გამოძიებას, მათ უნდა შეისწავლონ და გამოჰკითხონ მოწმეები.

სამსახურეობრივი ჩატია, ბევრი მესიჯია წაშლილი და მერე მიწერილია, ჩვენ ხომ მაინც ვიცით, რა მოხდაო. შინაარსი მოიაზრებს იმას, რომ გარკვეული ინფორმაცია, რაც ჩვენთვის და გამოძიებისთვის არაა ცნობილი, არსებობს და ეს უნდა გამოიკვლიოს გამოძიებამ", — აცხადებს ადვოკატი.

27 წლის ახალციხელი ექთანი, რომელიც პირველ საუნივერსიტეტო კლინიკაში მკურნალობდა, 19 მარტს გარდაიცვალა.

18 მარტს გავრცელდა ინფორმაცია, რომ ახალციხეში ექთანი AstraZeneca-ს ვაქცინის გაკეთების შემდეგ კომაში ჩავარდა. მოგვიანებით გაირკვა, რომ მას სავარაუდოდ, ანაფილაქსიური რეაქცია ჰქონდა.

ბრიფინგზე ჯანდაცვის მინისტრის მოადგილემ და NCDC-ის დირექტორმა აღნიშნეს, რომ, შესაძლოა, ეს იყოს ვაქცინის გვერდითი ეფექტი, თუმცა ამის დასადგენად მიმდინარეობს კვლევა. ამის შემდეგ ჯანდაცვის სამინისტროში ექსპერტებმა AstraZeneca-ს ვაქცინის სამომავლო გამოყენებაზე იმსჯელეს და გადაწყვიტეს, რომ ამ პრეპარატით აცრა არ შეჩერდება.

გაბუნიამ აღიშნა ისიც, რომ AstraZeneca-ს ვაქცინას მსგავს გვერდით რეაქცია აქვს უკვე დაფიქსირებული — ბრიტანეთის მონაცემებით, 5 მილიონი შემთხვევიდან 41 იყო მსგავსი ანაფილაქსიური გვერდითი რეაქცია. მანვე აღნიშნა, რომ ვაქცინის რისკი მის სარგებელთან შედარებით ყოველთვის ნაკლებია.

ამავე თემაზე: