ნეტფლიქსმა კომიქსების გამომცემლობა BOOM! Studios-გან უფლება შეიძინა, რომ სულ ახალი კომიქსის სერიის BRZRKR მიხედვით მძაფრსიუჟეტიანი ფილმი გადაიღოს.

მორიგ ბლოკბასტერზე მუშაობა ამ სტრიმინგ სერვისისგან განსაკუთრებული სიახლე არ იქნებოდა, რომ არა ის ფაქტი, რომ BRZRKR-ის ავტორი კიანუ რივზია და თავისივე კომიქსის ეკრანიზაციაშიც მთავარ როლს მოირგებს და პროდიუსერიც იქნება.

მეტიც, ფილმის შემდეგ კომიქსის სერიის მიხედვით ანიმეს სტილში სერიალის გადაღება იგეგმება, რომელსაც ასევე კიანუ რივზი გაახმოვანებს.

როგორც ჩანს, კიანუ რივზი იმასთან ერთად, რომ უბერებელია, აპირებს დაამტკიცოს, რომ ყოვლისშემძლეცაა.

ფოტო: Giphy

BRZRKR უკვდავი მებრძოლის შესახებ მოგვითხრობს, რომელიც ნახევრად ადამიანია და ნახევრად — ღმერთი. მას იცნობენ, როგორც B (ბი) და წყევლის გამო ცივსისხლიანი ძალადობისკენაა მიდრეკილი. სწორედ ამ მთავარ როლს მოირგებს კიანუ რივზი მომავალ ფილმში.

ამ თორმეტნაწილიანი კომიქსის პირველი თავი აშშ-ში 3 მარტს გამოქვეყნდა და დროის ძალიან მცირე დროში ტირაჟი ამოიწურა: უკვე 615 000-ზე მეტი ეგზემპლარია გაყიდული.

ფოტო: BOOM! Studios

კიანუ რივზი ბოლო წლებში ჰოლივუდის მძაფრსიუჟეტიანი ბლოკბასტერების ერთ-ერთ ყველაზე კაშკაშა ვარსკვლავად იქცა. ცოტა ხნის წინ მან საკულტო მატრიცის მეოთხე ნაწილის გადაღებები დაასრულა, რომლის პრემიერა ამ წლის ბოლოს შედგება და მალე John Wick 4-ზე იწყებს მუშაობას.

შესაბამისად, კიანუ რივზის გულშემატკივრები უახლოეს მომავალში ნამდვილად არ მოიწყენენ.