მნიშვნელობა არ აქვს, ცხოვრებაში უმუშევრობის ეტაპი გვაქვს თუ დასაქმებულობის — ალბათ ყოველთვის წარმოვიდგენთ ზღაპრულ სამსახურს, რომლის პირობებიც წალკოტში ცხოვრებასა და საღამოობით ჭიქა ღვინის წრუპვას მოიაზრებს.

ამ ზღაპრული ფანტაზიისგან არცთუ ისე შორსაა ამერიკული ღვინის კომპანიის შეთავაზება, რომელიც ახალ თანამშრომელს ეძებს.

კალიფორნიის შტატში მდებარე მერფი-გუდის მეღვინეობამ ცოტა ხნის წინ ახალი ვაკანსია გამოაცხადა. "თუკი სიტყვა 'კაბერნეს' თქმა შეგიძლია, ჩვენ შენ გეძებთ", — წერია ვაკანსიის აღწერაში.

ერთადერთი იღბლიანი აპლიკანტი, რომელიც პოზიციაზე დასაქმდება, უფასოდ იცხოვრებს მზიან შტატში, ვენახების მახლობლად.

ახალ სამსახურში პირველი რამდენიმე თვის განმავლობაში სხვადასხვაგვარი საქმის მოსინჯვა შეგეძლებათ, რათა მეღვინეობის სპეციფიკაში უკეთ გაერკვეთ. მოგვიანებით კი, თავადვე აირჩევთ, რომელ პოზიციაზე გსურთ მუშაობის გაგრძელება. ამ დროისთვის უკვე უნდა იცნობდეთ ვენახებს და მეღვინეობის ტექნიკას, თანაც ელექტრონულ კომერციაშიც გაგეგებოდეთ "ანი-ბანი".

1985 წელს დაფუძნებულმა მეღვინეობის კომპანიამ მსგავს პოზიციაზე ვაკანსია თავდაპირველად 2009 წელს გამოაცხადა. მაშინ დასაქმებულს სოციალურ ქსელში მეღვინეობის პოპულარიზაცია და კომპანიის საქმიანობით ციფრული კონტენტის შექმნა ევალებოდა. წელს, პანდემიის გამო შექმნილი გამოწვევების საპასუხოდ, მეღვინეობამ კვლავ გადაწყვიტა ვაკანსია დაებრუნებინა.

რაც შეეხება წინაპირობებს — აპლიკანტი 21 წლის ან უფროსი უნდა იყოს და აშშ-ში მუშაობის ნებართვა ჰქონდეს. ამასთან, მან უნდა ჩაწეროს ვიდეო და ახსნას, რატომ არის ეს მისთვის "ოცნების სამსახური".

როგორც კომპანია იუწყება, აპლიკანტებიდან საუკეთესოს ისინი სხვადასხვა უნარ-ჩვევის, მათ შორის შემოქმედებითობის შეფასებით აარჩევენ.

თუმცა, ცხადია, უმთავრესი მოთხოვნა მაინც ღვინის სიყვარულია.

მეღვინეობა აპლიკაციებს 30 ივნისამდე იღებს, მათი იღბლიანი ახალი თანამშრომელი კი სამუშაოს სექტემბერში დაიწყებს.