შინაგან საქმეთა სამინისტროს ინფორმაციით, ოზურგეთის მუნიციპალიტეტში 22 წლის ახალგაზრდა დააკავეს, რომელსაც ოჯახის წევრის მიმართ დამამძიმებელ გარემოებაში ჩადენილი განზრახ მკვლელობა და ცეცხლსასროლი იარაღის უკანონო შეძენა-შენახვა-ტარება ედება ბრალად.

უწყების ცნობით, გამოძიებით დადგინდა, რომ ბრალდებულმა მამას ცივი იარაღის გამოყენებით რამდენიმე ჭრილობა მიაყენა და მიიმალა. შსს-ს განცხადებით, დაჭრილი კაცი შემთხვევის ადგილზე გარდაიცვალა.

შსს-ს ინფორმაციით, პოლიციის მიერ შემთხვევის ადგილიდან ნივთმტკიცების სახით ამოღებულია დანაშაულის ჩადენის იარაღი — დანა, ხოლო დაკავებულის პირადი ჩხრეკისას ამოღებულია "ნაგანის" ტიპის ცეცხლსასროლი იარაღი.

გამოძიება სისხლის სამართლის კოდექსის 11 პრიმა 109-ე მუხლის მე-2 ნაწილის ვ ქვეპუნქტით და 236-ე მუხლის მე-3 და მე-4 ნაწილებით მიმდინარეობს, რაც ოჯახის წევრის მიმართ დამამძიმებელ გარემოებაში ჩადენილ განზრახ მკვლელობის და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.