"ვინც იძახის იძახის, თავის თავზე იძახის", — ამ ანდაზით უპასუხა ოკუპანტი ქვეყნის რუსეთის პრეზიდენტმა, ვლადიმერ პუტინმა აშშ-ს პრეზიდენტ ჯო ბაიდენს, რომელმაც მას მკვლელი უწოდა. ჟურნალისტებთან საუბრისას, პუტინმა ასევე თქვა, რომ "ირონიის გარეშე" ბაიდენს ჯანმრთელობას უსურვებს.

"ყველა ხალხის ყველა სახელმწიფოს ისტორიაში არის დრამატული, რთული და სისხლიანი მომენტი. მაგრამ როცა ჩვენ ვაფასებთ სხვა ადამიანებს ან თუნდაც სხვა სახელმწიფოებს, სხვა ხალხს, ჩვენ თითქოს სარკეში ვიყურებით. იქ ყოველთვის საკუთარ თავს ვხედავთ. რადგან ყოველთვის სხვა ადამიანს[...]

და იცით, ასეთ დროს მახსენდება, რომ ბავშვობაში როცა ეზოში ერთმანეთს ვეკამათებოდით, ვამბობდით: "ვინც იძახის იძახის, თავის თავზე იძახის". და ეს შემთხვევითი არაა, ეს არაა საბავშვო ანდაზა და ხუმრობა. ამაში საკმაოდ ღრმა ფსიქოლოგიური აზრია. სხვა ადამიანში ყოველთვის საკუთარ თვისებებს ვხედავთ და ვფიქრობთ, რომ ის ისეთივეა, როგორც ჩვენ", — განაცხადა პუტინმა.

აშშ-ს პრეზიდენტმა, ჯო ბაიდენმა ინტერვიუს დროს დადებითად უპასუხა კითხვას, მიიჩნევს თუ არა რუსეთის პრეზიდენტ ვლადიმერ პუტინს მკვლელად. გარდა ამისა, ბაიდენმა განაცხადა, რომ პუტინი "გადაიხდის" ამერიკის არჩევნებში ჩარევისთვის.

მალევე რუსეთის საგარეო საქმეთა სამინისტრომ განაცხადა, რომ აშშ-დან კონსულტაციებისთვის ელჩს იწვევდა, თუმცა მიზეზად ბაიდენის განცხადება არ დაუსახელებიათ.