ბრიუსელში ვიზიტით მყოფი საქართველოს პრემიერმინისტრი, ირაკლი ღარიბაშვილი აცხადებს, რომ შემდეგი არჩევნები ქვეყანაში 2024 წელს ჩატარდება. ღარიბაშვილმა საქართველო-ევროკავშირის ასოცირების საბჭოს სხდომის შემდეგ გამართულ პრესკონფერენციაზე, ასევე, თქვა, რომ ვადამდელი არჩევნების დანიშვნა მისი პრეროგატივა არ არის.

ჩემი პრეროგატივა არ არის გადავწყვიტო, როდის ჩატარდება ვადამდელი. ეს ძალიან მკაფიოდაა ნათქვამი კონსტიტუციაში, ჩვენ გვქონდა ძალიან თავისუფალი, გამჭვირვალე არჩევნები 2020 წლის ოქტომბერში. ყველა საერთაშირისო ორგანიზაციამ, OSCE/ODIHR-მა, ყველა საერთაშორისო დამკვირვებელმა აღიარა, რომ ეს არჩევნები იყო თავისუფალი და სამართლიანი და კონკურენტული. ამიტომ, შემდეგი საპარლამენტო არჩევნები საქართველოში 2024 წელს ჩატარდება", — განაცხადა ღარიბაშვილმა.

პრემიერმინისტრი ბრიუსელში 15 მარტს გაემგზავრა. ის საქართველო-ევროკავშირის ასოცირების საბჭოს მე-6 სხდომაში მონაწილეობს.

ვიზიტის ფარგლებში იმართება მაღალი დონის შეხვედრები როგორც ევროკომისიაში, ევროპულ საბჭოსა და ევროპარლამენტში, ასევე — NATO-ში.

17 მარტს შეხვედრები შედგება ევროპარლამენტსა და ნატოში. საქართველოს მთავრობის მეთაურს ნატოს შტაბბინაში ალიანსის გენერალური მდივანი იენს სტოლტენბერგი უმასპინძლებს. შეხვედრის შემდეგ, ირაკლი ღარიბაშვილის და იენს სტოლტენბერგის ერთობლივი პრესკონფერენცია გაიმართება. ასევე, დაგეგმილია ნატო-საქართველოს კომისიის სხდომა.

საქართველოს დელეგაციაში, რომელსაც პრემიერმინისტრი ხელმძღვანელობს, ვიცე-პრემიერი, საგარეო საქმეთა მინისტრი დავით ზალკალიანი, ეკონომიკისა და მდგრადი განვითარების მინისტრი ნათია თურნავა და იუსტიციის მინისტრი გოჩა ლორთქიფანიძე იმყოფებიან.