ქართული ოცნების თავმჯდომარის, ირაკლი კობახიძის მტკიცებით, ევროპული საბჭოს პრეზიდენტის წარმომადგენელ, კრისტიან დანიელსონთან შეხვედრაზე პრემიერმინისტრის არმისვლა ჩანაწერების გავრცელებას არანაირად არ უკავშირდება. მისი თქმით, ღარიბაშვილი იმიტომ არ დადის, რომ ეს პოლიტიკური დიალოგის საკითხია, პარტიას კი ის წარმოადგენს.

"რაც შეეხება დიალოგში წარმომადგენლობას, რადგან ეს არის დიალოგი პოლიტიკურ პარტიებს შორის მე, როგორც პარტიის თავმჯდომარე, ვარ ჩვენი პარტიის წარმომადგენელი ამ დიალოგში და შესაბამისად, ასე არის როლები გადანაწილებული. რაც შეეხება წინა შეხვედრას, ეს არ იყო დიალოგის ნაწილი, ეს იყო მოსამზადებელი შეხვედრა დიალოგისთვის. ამასთან დაკავშირებით შეთანხმება შედგა შარლ მიშელსა და ირაკლი ღარიბაშვილს შორის, პრემიერმინისტრის შორის, აქედან გამომდინარე, ლოგიკური იყო, რომ იმ დღეს სწორედ პრემიერმინისტრი ესწრებოდა ამ შეხვედრას", — განაცხადა მან.

კრისტიან დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავარაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: