საჩხერის სასამართლომ დააკმაყოფილა ერთ-ერთი მოქალაქის საჩივარი ღია სივრცეში პირბადის არტარების გამო გამოწერილი ჯარიმის გასაუქმებლად. ინფორმაცია On.ge-ს სასამართლოში დაუდასტურეს.

"სასამართლომ პირბადესთან დაკავშირებით საჩივარი დააკმაყოფილა, ანუ გააუქმა ჯარიმა", — გვითხრეს უწყებაში.

მოსამართლემ გადაწყვეტილება დღეს, 10 მარტს გამოაცხადა. მისი თქმით, მოქალაქე გიორგი ჭიღლაძის მიმართ 2020 წლის 25 დეკემბერს პირბადის ტარების წესის დარღვევის გამო გამოწერილი ჯარიმა გაუქმდა.

"გამოცხადებული არის გიორგი ჭიღლაძე, საჩივრის ავტორი. სასამართლო აცხადებს საქართველოს სახელით, დღეს 10 მარტია 2021 წლის, სასამართლო ხელმძღვანელობს საქართველოს ადმინისტრაციული საპროცესო კოდექსის პირველი მუხლის მეორე ნაწილით, ადმინისტრაციული საპროცესო კოდექსის მე-6 მუხლით, საქართველოს ადმინისტრაციულ სამართლადარღვევათა კოდექსის მე-9, მე-11, 116-ე, 271-ე მუხლით და დაადგინა, გიორგი ჭიღლაძის საჩივარი დაკმაყოფლიდეს. გაუქმდეს გიორგი ჭიღლაძის მიმართ 2020 წლის 25 დეკემებრს გამოწერილი საჯარიმო ქვითარი", — თქვა მან.

16 თებერვალს, ჯანმრთელობის დაცვისა და სოციალურ საკითხთა და ადამიანის უფლებათა დაცვისა და სამოქალაქო ინტეგრაციის კომიტეტების ერთობლივ სხდომაზე, დეპუტატებმა ერთხმად დაუჭირეს მხარი კანონპროექტს, რომლის მიხედვითაც როგორც ღია, ისე დახურულ საჯარო სივრცეში, ასევე, საზოგადოებრივ ტრანსპორტში, პირბადის ტარების წესის განმეორებითი დარღვევა დაჯარიმდება 50 ლარით. კანონპროექტის ავტორები არიან კომიტეტის წევრები — ლადო კახაძე და ზაზა ლომინაძე, ასევე, კომიტეტის თავმჯდომარე, დიმიტრი ხუნდაძე.

2020 წლის 12 ივნისიდან პირბადის ტარების წესის დაღვევა რეგულირდება ადმინისტრაციულ სამართალდარღვევათა კოდექსით და ითვალისწინებს ჯარიმას 20 ლარის ოდენობით.