საქართველოში ამერიკის შეერთებული შტატების საელჩოს განცხადებით, აშშ მიესალმება ეუთო/ოდირის არჩევნების მცირემასშტაბიანი სადამკვირვებლო მისიის საბოლოო ანგარიშის გამოქვეყნებას, იზიარებს ამ შეშფოთებას და მოუწოდებს პარლამენტს, გააგრძელოს რეფორმაზე ფართო მსჯელობის პროცესი.

"ანგარიში ხაზს უსვამს მნიშვნელოვანი რეფორმების გაგრძელების აუცილებლობას, კერძოდ კამპანიის დაფინანსების, საარჩევნო ადმინისტრაციის შემადგენლობისა და დავების გადაწყვეტის თვალსაზრისით. შეერთებული შტატები იზიარებს ამ შეშფოთებას და მოუწოდებს პარლამენტს, გააგრძელოს რეფორმაზე ფართო და ინკლუზიური მსჯელობის პროცესი, რომელიც დააკმაყოფილებს ოდირის მრავალწლიან რეკომენდაციებს. ეს მნიშვნელოვანი რეფორმები გააძლიერებს პოლიტიკურ პლურალიზმსა და დემოკრატიას და დაეხმარება საქართველოს, მიაღწიოს მზარდი ევროატლანტიკური ინტეგრაციის მიზნებს. სამოქალაქო საზოგადოებასა და ოპოზიციას, მათ შორის ამჟამად პარლამენტს გარეთ მყოფ ოპოზიციურ პარტიებს, მნიშვნელოვანი ხედვა აქვთ, რაც უნდა იყოს გათვალისწინებული. მოვუწოდებთ ყველა დაინტერესებულ მხარეს, კეთილსინდისიერად ჩაერთონ რეფორმების პროცესში იმისთვის, რომ პარლამენტი გაძლიერდეს და მომავალი არჩევნები იყოს უფრო თავისუფალი და სამართლიანი", — აღნიშნულია აშშ-ის საელჩოს განცხადებაში.

ეუთო/ოდირმა საქართველოში ჩატარებული საპარლამენტო არჩევნების შესახებ საბოლოო ანგარიში გამოაქვეყნა, სადაც ხელისუფლებას 8 რეკომენდაციით მიმართავს. ეს რეკომენდაციები არჩევნების ჩატარების პროცესის გაუმჯობესებას ეხება და თანხვედრაშია საერთაშორისო ვალდებულებებთან.

საბოლოო შეჯამებაში ეუთო/ოდირი მიმოიხილავს როგორც წინასაარჩევნო პროცესს, ასევე, უშუალოდ არჩევნების დღესა და შემდგომ განვითარებულ პროცესებს. მისიის შეფასებით, არჩევნები კონკურენტული იყო და საერთო ჯამში, დაცული იყო ძირითადი მოთხოვნები, თუმცა, საზოგადოებაში სანდოობა შეამცირა ფართოდ გავრცელებულმა მოსაზრებამ ამომრჩევლის ნებაზე ზეგავლენის შესახებ და ადმინისტრაციულ რესურსსა და პარტიულ რესურსს შორის ზღვრის წაშლამ.