ყველასათვის საყვარელი სპანჯბობის სამყაროს ახალი ანიმაციური სერიალი The Patrick Star Show შეემატება. როგორც სახელწოდებიდანაც მიხვდებოდით, იგი სპანჯბობის საუკეთესო მეგობრის, პატრიკის შესახებ მოგვითხრობს. ანიმაციური სერიალი 13 ეპიზოდისგან შედგება და მასზე SpongeBob SquarePants-ის შემქმნელები მუშაობენ. სერიალის პრემიერა ზაფხულში შედგება.

The Patrick Star Show პატრიკისა და მისი ოჯახის ცხოვრებას გაგვაცნობს. სერიალში პატრიკი საკუთარ სახლში სამეზობლოსთვის სატელევიზიო შოუს მასპინძლობს. პატრიკს მშობლები, და და ბაბუა აქტიურად გულშემატკივრობენ და ეხმარებიან, რაც, რა თქმა უნდა, ხშირად კომიკურ სიტუაციებს ქმნის.

The Patrick Star Show სპანჯბობის მეორე სპინოფია. პირველი სპინოფის, Kamp Koral: SpongeBob’s Under Years-ის 6 ეპიზოდი Paramount+-ზე უკვე გამოვიდა. დარჩენილი 7 ეპიზოდის ნახვას მაყურებლები მოგვიანებით შეძლებენ.

აღსანიშნავია, რომ SpongeBob SquarePants მაყურებლებმა პირველად 1999 წელს იხილეს და ის პოპულარულობას დღემდე არ კარგავს. სპანჯბობის სამყარომ და გამორჩეულმა პერსონაჟებმა პოპ-კულტურაზე უდიდესი გავლენა იქონია და ის დღემდე ყველა ასაკის მაყურებლის ერთ-ერთი საყვარელი ანიმაციური სერიალია.