დღეს, 21 მაისს, ე.წ. კაბელების საქმეზე გამოტანილი განაჩენის გასაპროტესტებლად თავისუფალი დემოკრატები 14 საათზე საპროტესტო აქციას მთავარ პროკურატურასთან გამართავენ.

მათ აქციის გამართვა მას შემდეგ გადაწყვიტეს, რაც 16 მაისს სასამართლომ აღნიშნულ საქმეში ბრალდებული თავდაცვის სამინისტროს 5 ყოფილი მაღალჩინოსანი დამნაშავედ ცნო და სასჯელად თავისუფლების 7 წლით აღკვეთა მიუსაჯა.

თავისუფალი დემოკრატები მიიჩნევენ, რომ განაჩენი უსამართლოა და საქმეს პოლიტიკური სარჩული აქვს. ამავე აზრს იზიარებენ არასამთავრობო ორგანიზაციები და განმარტავენ, რომ დანაშაულისთვის, რომლისთვისაც თავდაცვის სამინისტროს ყოფილი თანამშრომლები გაასამართლეს, მოტივი არ არსებობდა და საქმე პოლიტიკურად ანგაჟირებულია.

საქმეზე გამოტანილ განაჩენს გამოეხმაურა ასევე პარლამენტის თავჯდომარე, დავით უსუფაშვილიც, რომელმაც განაცხადა, რომ ამ საკითხთან დაკავშირებით კითხვები უფრო მეტი დარჩა, ვიდრე პასუხები მიიღო საზოგადოებამ.

თავის მხრივ, საქმის პროკურორმა, ნინო აღლემაშვილმა კი განმარტა, რომ პროკურატურამ სასამართლოში წარადგინა ურთიერთშემხებლური, უტყუარი მტკიცებულებები, რომელთა გამოკვლევის შემდეგ "გამამტყუნებელი განაჩენს ალტერნატივა არ ჰქონდა".