აფხაზეთის დე–ფაქტო რესპუბლიკის სამხედრო პროკურატურამ განზრახ მკვლელობის მუხლით დაიწყო გამოძიება საქართველოს მოქალაქე გიგა ოთხოზორიას მკვლელობის ფაქტზე.

ოკუპირებული აფხაზეთის სამხედრო პროკურატურა წერს, რომ მკვლელობას წინ დაპირისპირება უძღოდა (სტილი დაცულია):

"19 მაისს, ნაბაკევის სასაზღვრო–გამშვებ პუნქტზე, აფხაზეთის უსაფრთხოების სამსახურის სასაზღვრო დანაყოფის თანამშრომლებსა და საქართველოს მოქალაქე გიგა ოთხოზორიას შორის, რომელიც ნასვამ მდგომარეობაში იმყოფებოდა, მოხდა ინციდენტი. დოკუმენტების მოუწესრიგებლობის გამო, მესაზღვრეებმა მას აფხაზეთის ტრიტორიაზე შესვლის საშუალება არ მისცეს. ამის შემდეგ, დაპირისპირება ჩხუბში გადაიზარდა და ინციდენტმა ქართულ მხარეს გადაინაცვლა, სადაც, არსებული მონაცემებით, ოთხოზორია იარაღიდან გასროლით იქნა მოკლული".

აფხაზეთის დე–ფაქტო მთავრობა აპირებს, რომ 14–15 ივნისს, ჟენევის ფორმატში გასამართი მოლაპარაკებებისას, ქართულ მხარეს მოსთხოვოს გამოძიებისთვის საჭირო მტკიცებულებების გაგზავნა.

"რადგან შემთხვევა საქართველოს ტერიტორიაზე მოხდა, ჩვენი საგამოძიებო მოქმედებები შეზღუდულია" – აცხადებს აფხაზური მხარე.

საქართველოს მოქალაქის მკვლელობას უკვე გამოეხმაურა საქართველოს საგარეო საქმეთა სამინისტრო და შემთხვევაზე პასუხისმგებლობა მთლიანად რუსეთის ფედერაციას დააკისრა. რუსეთის საგარეო საქმეთა სამინისტროს თქმით კი, აღნიშნულთან არანაირი კავშირი არ აქვს რუს სამხედროებსა და მაღალჩინოსნებს.

საქართველოში ევროკავშირის სადამკვირვებლო მისიის განცხადებით კი, ხელისუფლებამ სასწრაფოდ უნდა გამოიძიოს ხურჩაში მომხდარი მკვლელობა.