ევროკავშირის სადამკვირვებლო მისია 19 მაისს, ხურჩა-ნაბაკევის გამშვებ პუნქტთან მომხდარ მკვლელობას განცხადებით ეხმიანება.

ევროკავშირის სადამკვირვებლო მისია მოუწოდებს ხელისუფლებას რომ უმოკლეს ვადაში ჩატარდეს საფუძვლიანი გამოძიება. განცხადების თანახმად, ყველა მხარემ თავი უნდა შეიკავოს ისეთი ქმედებებისგან, რომელთაც შესაძლოა სიტუაციის ესკალაცია გამოიწვიონ.

სადამკვირვებლო მისია თვითმხილველების ინფორმაციაზე დაყრდნობით აცხადებს რომ უსაფრთხოების სფეროში მოქმედი სტრუქტურების შეიარაღებულმა წარმომადგენლებმა გადმოკვეთეს ხიდი აფხაზეთის მხრიდან თბილისის მიერ ადმინისტრირებულ ტერიტორიაზე და სროლა განახორციელეს:

"ევროკავშირის სადამკვირვებლო მისიამ აამოქმედა ცხელი ხაზი და ხელს უწყობს ინფორმაციის გაცვლას. ჩვენ მოგვაწოდეს ინფორმაცია, რომ გამოძიება ადმინისტრაციული საზღვრის ორივე მხარეზე მიმდინარეობს".

ევროკავშირის სადამკვირვებლო მისიის წარმომადგენლები ადგილზე იმყოფებიან და აკვირდებან ვითარებას, აგროვებენ ინფორმაციას და მას ევროკავშირის ინსტიტუტებსა და ევროკავშირის წევრ სახელმწიფოებს გადასცემენ.

19 მაისს, დაახლოებით 14:30 საათზე ზუგდიდის რაიონის სოფელ ხურჩაში, საოკუპაციო ხაზის მიმდებარედ, ოთხმა შეიარაღებულმა პირმა ცეცხლსასროლი იარაღით გალის რაიონის სოფელ ბარღების მკვიდრ გიგა ოთხოზორიას ჭრილობა მიაყენა, რის შედეგადაც ის გარდაიცვალა.